Uei uta u Badri Rai ban klun lut ïa ka spah na ka ri jongngi: Bah Ardent

Nongstoiñ, Ïaïong 17: U President rangbah jong ka Voice of the Peoples Party Bah Ardent Miller Basaïawmoit, haba ai jingkren ha ka sngi palei hakhmat iew Nongstoiñ hakhmat ki paidbah bun byllien, u la ther tyngeh ïa ka sorkar MDA ba la ïalam da ka NPP bad u Conrad Sangma ba ka dei tang ka sorkar ban shu pynbiej bad pynthame ïa ki paidbah, ha kaba u Myntri Rangbah mynta u bunkam ban leit rung iew ban pynthame paidbah, kaba la jia ruh ha ka sngi balang ha kaba u Conrad Sangma u ïaid lynti da ka kjat bad pajut kti bad ki nongshong madan hakhmat iew Nongstoiñ.
Haba kren ha katei ka sngi u bah Ardent u la ong, “U Chief Minister kumba long mynta u bunkam ban leit rung iew ha kiba bun ki jaka, kata hadien shi phew snem u la sdang rung iew kata ruh hadien ba la hikai ka VPP. Shano baroh shikatta bad haba la ïalam ka VPP la sdang bud tynneng ban rung iew. Hato kane kam dei tang ka buit kumno ban pynbiej pynthame”.
“Phi ïohi mynta ba shu kynsan kynsan ki sngewkhia ïa ka jaidbynriew, hana ba ki la rai ban sdang tih bniah noh ïa ka history jong ka jaidbynriew, nangno ki Khasi ki wan nangno ki Garo ki wan. Hana ba kata ka sorkar MDA ka sngewkhia na ka bynta ka jaidbynriew”, u la ong bad bynrap, “Ka sorkar MDA kumba ka paw bad long mynta ka bakla ban buh ïa ki mat treikam ha ka rukom kaba ka dei, kumno ban buh bad kiei kiba dei ban pyndep shwa bad kiei kiba dei ban sa leh pat hadien”.
“Ka jingshisha hi ka long ka jaidbynriew kumba long mynta kam donkam ban tip nangno ngi mih nangno ngi wan. Kaba ka jaidbynriew mynta ka donkam ban tip ka long nangno une u Badri Rai u mih, balei tang ma u ban ïoh ki kam bah eh ha ka Jylla jong ngi. Balei tang ma u ban pyntrei lut ïa ki kam kiba da ki spah klur bad ki hajar klur. Nangno une u Badri Rai u mih?. Kata ka dei ka jingkylli ba ka jaidbynriew ka donkam ban tip”.
“Wat ïathuh khana sarong ïa ka 300 klur ïa ka 1000 klur haba ki nongmyntoi na ka spah klur bad hajar klur, ki dei kiba nabar suda na ka jylla jong ngi. Hato na Nongstoiñ la ju don kiba ïoh pyntrei ïa ki project ba heh, em tang kiba nabar jylla suda. Hynrei ki dang nud ban pynbiej ïa ngi ban sdang tohkit ïa ka tynrai ka thymmei u Khasi”.
“La ïathuh ba une u Badri Rai u dei u ba pyntrei lut ïa ki project baroh ha ka Jylla Meghalaya. Wat ïa ka project kaba thmu ban tei ha Umïam ruh dei une hi u juh u briew ban pyntrei. Don wat ki khep ba um lah ne jop tender tangba hadien pat dei une hi u ba pyntrei ïa ki jingtrei”.
“Kane kajuh ka sorkar MDA ka nud ban pynïasyriem ïa nujor ïa ka party kaba dang shu kha shen kaba dang shu bat mynta ïa ka bor synshar ha KHADC dang katto katne por, hynrei ban pynïakajuh bad ka sorkar lane ka party kaba la synshar ïa ka jylla mynta la jan ar sien ar wat. Ki nongkyrshan baieit jong ka ki nud ruh ban ïa nujor ïa u bah Ardent kum u MLA bad u Conrad kum u CM”.
“Ym tang katta kiba bun ki nongkyrshan jong ki seng saiñ pyrthei ba don ha ka MDA, ki bunkam satang ban pynthame ïa ki paidbah ban pyni ba uta u CM u nongïalam jong ki u ba trei da ki kam. Katba kiba bun ki nongtrei sorkar ha ki tnad bapher bapher kim pat ïoh wat tang ïa ka tulop ruh”.
“Kane ka sorkar imat ka jingkyrduh pisa ka lah ban long ba baroh ka pisa tyngka la pynphai lut sha kata ka Chief Minister Special Development Fund, ban pynkyreit ïa u CM ban leit sarong sha ki Constituency ban ai skhim ba kin ïa kmen bad la ïoh jingïarap na kata ka CMSDF. Bapli kito ki nongïoh skhim ki ïa mareh ban leit shim bad haba ki leit, ki hap ban da ai khublei kyrpang lyngba ki lad pathai khubor ba dei u CM u ba ai ha kine ïa kane ka skhim”.
“La 50 tylli ki snem ba ngi la ïoh ïa ka jylla, ngi hap ban ïoh sngew ïa kita ki jingeh ïa ki Khasi ki jong ngi ha ki jaka khappud ha Mawsikar, ha kaba ym shah ban shna ïing lane rep ha ki jaka ba ki ong ïa kajïa khappud. Katba ïa ki Nepali ki shah ban shna ïing bad ban rep katba mon. Kumba ka paw kane ka sorkar MDA ka kham ñiew kor ïa u Nepali ba un wan buhai shnong bad knieh ïa ki jaka jong ki paradoh parasnam jong ngi”.
“Ngi ïoh jingtip ba ha ka 15 tarik sngi balang u myntri rangbah u leit ha ka shnong Ksehkohlong, ka shnong jong u Bansiewdor u samla u ba shah thngan na ka bynta ka mariang. Kumno u myntri rangbah u nud ban leit sha ka shnong jong u. Kane hi ka dei ka jingleh khnang bad ka jingñiew beiñ ñiewpoh, namar ban leit peit ïa u ha madan Malki um don por katba haduh shnong Ksehkohlong u nud ban leit ban ïakynduh ïa ki nongshong shnong”.