Ka jingïohrung ki bar jylla ha ki shnong dei ka jingbymshimkhia ki nongsynshar: Bah L. Dkhar

Nongstoiñ, Ïaïong 17: Katba nang mih ki sngi ki bar jylla kim salia shuh ban rung ha man la ki shnong la ha ki jaka sor ne kyndong na ka bynta ban kamai da kaba leit tyrwa tiar haman la ki thliew ïng, ong u Bah Lamphrang Dkhar u nongïalam ka Hynñiewtrep Youth Council Marskuiñ area haba ïakren bad u nongthohkhubor.
U Bah Dkhar u la pynpaw ruh ïa ka jingsngewkhia ha kaba ïadei bad katei ka bynta ha kaba u la ong ba ka jingïoh lad jong ki bar jylla ka dei na ka jingbym shimkhia jong ki nongsynshar kum ki syiem bad ki sordar bad ki rangbah shnong bad ka lah ban dei ruh na ka jingbha beij jong ki nongshong shnong. Ha kajuh ka por u la ong ba ha ki snem ba la dep ki la don ki bar jylla kiba wan tyrwa tiar ha shnong Marskuiñ da kaba leit rung ha man la ki thliew ïng. U la ong ba kitei ki bar jylla kim salia ne kheiñ snep wat lada ki don tang ki kynthei ki khynnah ruh ki rung beit beit haduh kamra shet ja.
U la ong ruh ba ha katei ka por u la bat ïa ki ban tohkit bad ban kylli ki wan na kano ka shnong bad kitei ki bar jylla ki la ïathuh ba ki dei kiba wan na Shillong bad haba u la kylli la ki don ne em ïa ki kot ki sla ki la pyni tang ki Adhaar card kumta u la phah leit phai noh ïa ki.
Utei u nongïalam ka seng u la ong ruh ba ka jingbym shimkhia jong ki nongsynshar Hima bad ki nongsynshar shnong ban buh da ki kyndon ba pyrkhing ïa ka jingwan rung klumar ki bar jylla ha ki shnong ki thaw ka buh ha ka jingma ïa ki kynthei ki khynnah namar ym lah ban tip la ki dei kiba bha ne kiba sniew jinglong tangba wat lada ki long kumno kumno ruh ïa ki bar jylla ym lah satia ban shaniah klumar khamtam eh ha ki nongkyndong ba ki nongshong shnong ki dang long shisur ha ka longbriew man briew kumta ki bar jylla kim salia ban shim kabu ban leh ïa kino kino ki kam sniew.
U la ong ruh ba ym lah ban len ba ki riew sniew ki kham sian bha ka buit jong ki bad na ka bynta ka jingmyntoi jong ki ha kano kano ka bynta ki leh mynleh kum kiba wan tyrwa tiar kum ki jaiñ ki nep, ki tiar ïng tiar sem tang ban ïoh lad kumno ban pynbiej ïa ki kynthei ki khynnah bad wat ban ïoh rong tuh ïa ki mar ki mata kiba rem dor. Nalor kata u la ong ruh ba ha kane ka juk mynta lei lei lada ki nongshong shnong ki kham ïakren pariah parai kin sa pan ïa ki mobile number bad ha kawei ka sngi kin sa phone bad kin thok laiphew jait bad dei hangta ba lada ki bakla ban ngeit kan long kum ka jingriam ban pynjot.
Ha kajuh ka por u la ong ba ki lah ban pynbiej ruh ba ki lah ban don ïa ki tiar kiba bha bad ka dor ka kham tad ban ïa kiba thied na ïew na hat phewse lada thied ïa kitei ki tiar ynda la pyndonkam kim ïadei satia kumba ki ong bad tang katto katne por ki tiar ki la sniew noh. Khatduh eh u la kyntu ïa ki nongsynshar hima, ki nongsynshar shnong bad kiwei pat ki sengbhalang ba kin peit ngor bha halor kane khnang ba kan ym jia kano kano ka jingeh ïa ki paitbah nongshong shnong.