Shillong, Iaiong 17 : Ka Liang Pyrshah Voice of the People Party (VPP) mynta ka sngi ka pynpaw ka jingpyrshah jur ïa ka jingrai bad tyrwa ka Bharatiya Janata Party (BJP) ban pynitynnad ïa ka Krem Mawjymbuiñ lyngba ka skhim sorkar pdeng kata ka PRASHAD bad Swadesh Darshan 2.0 kaba lam sha ka jingpynkylla ïa katei ka jaka jngohkai sha ka jaka leh niam pynban.
“ Ka VPP ka kwah ban pynshai kdaw ba ka krem Mawjymbuiñ ha Mawsynram ka dei ka jaka jngohkai bad ka dei ban ïaineh beit kumta. Kano kano ka jingpyrshang ban pynkylla ne pynitynnad ïa ka da kum wei pat khamtam ban pynkylla jaka lehniam ne jaka leh kino kino ki kolshor yn ym lah ban pdiang da lei lei ruh” ong u Nongpathai khubor ka VPP Dr AW Eani.
U bah Rani u la pynkynmaw ruh ba ka jingpyrshang ban pynkylla jaka lehniam ïa ka Krem Mawjymbuiñ da kawei ka niam ka la wanrah ka jingïakren bad jingïatai nia paidbah kaba la poi ruh haduh hakhmat ka aiñ. Kumta kine jingmih na kitei ki jingjia ki pynpaw shai kdar ba ïa katei ka jaka ym dei ban pynkylla da kumwei pat ne pynlong ïa ka kum ka jaka ïaid pilkrim la ka long ha kano kano ka rukom ruh.
Kumta na ka liang ka VPP ka kyntu jur ïa ki bor ba dei peit bad ïa kiba ïadon bynta ban shim ïa ka jingkitkhlieh bad ïada ia kane ka jaka. “ Ngi dei ban burom ïa ka jingsngew jong ki paidbah bad kiar na kino kino ki kam kiba lah ban wanrah ka jingïapher jingmut bad jingïa umsnam” ong biang u bah Rani da kaba kren shai kdar ruh ba ïa ka krem Mawjymbuiñ ym dei da lei lei ruh ban pynïasoh bad kano kano ruh ka niam ne jingngeit la ka long kumno kumno ruh ka dei ban ïai sah beit kumba ka long ban long beit ka jaka leit jngohkai ki nongwan jngohkai sha ka jylla” pynkut u bah Rani.
