Tang dep ka jingñiew vote ha Assam kyrmen ban bteng biang ka jingkren pynbeit pud Meghalaya – Assam

Shillong, Ïaiong 17 : Ki nongïalam ka Hill State People’s Democratic Party (HSPDP) ki la pynpaw ïa ka jingkyrmen ba hadien ba la dep ka jingñiew vote ha Assam, kan sa sdang biang ka jingkren pynbeit pud hapdeng ka Meghalaya bad Assam.
“Ngi kyrmen ba hadien ba la dep ñiew vote ha Assam ba ka jingkren pynbeit pud kan sa bteng biang ha ki hynriew tylli ki jaka kiba dang sahteng,” u la ong haba kren bad ki lad pathai khubor da kaba ïathuh ruh ba ha u snem ba la dep ki la pynkynmaw biang ïa ka sorkar jylla haba ïadei bad kane ka ishu pynbeit pud.
U Bah KP Pangniang u la ïathuh ruh ba dang shen na ka liang u Myntri Rangbah hi u la pyntip ba tad ynda la dep ka elekshon ha Assam kin sa ïoh ban bteng biang ïa ka jingkren pynbeit pud.
Ha kajuh ka por u la ïathuh ruh ba ka Party shen kan sa kynduh biang ïa u Myntri Rangbah ka Jylla ban pynkynmaw biang ïa kane ka jingïakren pynbeit pud.
“Ha kine hi ki khyndiat sngi ban wan ka party ka la rai ban kynduh biang ïa u Myntri Rangbah ban pynkynmaw ba kin sdang biang noh ïa ka jingkren pynbeit pud ha kito ki 6 tylli ki jaka ba dang sahteng,” la bynrap biang u President.
U Bah Pangniang u la ong ruh ba ka ishu pynbeit pud hapdeng ka Meghalaya bad Assam ka dei ka mat kaba kum ka party ki shimkhia bha bad buh ruh hakhmat eh bad kumta ki kwah ba ka sorkar jylla kan pynïaid beit shakhmat ïa kane ka kam kumba ka la dep ban pynbeit ïa ki 6 tylli ki jaka ha ka kylla kaba nyngkong.