ïakynduh u Myntri Rangbah ïa ki Achik Literary Society pynshai ba ithuh ïa ka ktien Khasi bad Garo

Shillong, Iaiong 17: U Myntri Rangbah ka jylla u Conrad K. Sangma mynta ka sngi 17 tarik Iaiong/2026 u la ïa kynduh ïa ki dkhot jong ka seng A’chik Literary Society ha Tura, kane ka jingïakynduh ka long ban batai sha ki ïa ka rai jong ka sorkar ban pynlong ïa ka ktien Garo bad Khasi ryngkat bad ka ktien phareng kum ka ktien sorkar. Ha kane ka jingïakynduh u Myntri Rangbah u la pynshai ba kane ka jingithuh kan kyntiew ïa kine ki ktien ha ka jylla bad kan long ruh kum ka jingkyrshan ïa kaei kaba ka ïing Dorbar Thawaiñ ka jylla kal a shim ïa ka rai da ka Resolution ban dawa ba ka sorkar pdeng ka dei ban pynrung noh ïa ka ktien Khasi bad Garo ha ka khyrngit kaba phra jong ka riti synshar ka Ri India.
U Myntri Rangbah u ai ka jingkhublei ïa ka A’chik Literary Society ïa ka jingtrei shitom bad ka jingïaineh lyngba ki jingthoh ban pynriewspah ïa ka ktien Garo ïa kane ka rai kaba ka sorkar kala shim ban ithuh ïa ka ktien Garo bad Khasi kum ka ktien sorkar ha ka jylla ka dei ka jingtrei shitom jong ki ban pynneh pynsah ïa ka ktien jong ki ha ka thoh ka tar ha ka ktien Garo.
U Myntri Rangbah u la ong ba kane ka jingdawa ban ithuh ïa ka Ktien Garo bad Khasi kum ka ktien sorkar ka dei ka jingdawa kaba la slem bha bad haba la poi ka por bad ka ïa kaba biang ka sorkar ka la shim ïa kane ka rai u la ong wat la ka sorkar ka la shim ïa ka rai kan shim katto katne por ban ïaid beit ïaid ryntih ha ka jingpyntrei kam bad da kane ka rai yn sa lah ban ïa kren ha ka Dorbar Thawaiñ ka jylla da ka ktien Garo bad Khasi.
Ha kane ka jingïakynduh na ka liang ka A’chik Literary Society ka ai ka jingkhublei ïa ka sorkar kaba la shim ïa kane ka rai ban pynlong ktien sorkar ïa ka ktien Garo, kum ka kynhun na ka por sha ka por ki la ïa kren bad ka sorkar ïa kane ka bynta bad mynta kaei kaba ki angnud ka la urlong.