Nongstoiñ, Ïaïong 16: La kumba arphew snem tam naduh ba ki rawon jong ka shnong Nonlang West Khasi hills ki la seng ïa ka synjuk kaba la tip kum ka Nonglang Pungsier Anglers Associtiation na ka bynta ban peitngor ba kan ym don kano kano ka jingpynïap pathar ïa ki doh um doh wah ha ka wah Tyrsung, ban siat pathar ïa ki mrad ki mreng bad ki sim ki doh ha ka thaiñ ka la pynsngew tynnad ïa ki nongkhwai haba ki leit ban khwai ha ki aïom slap ha katei ka wah.
Wat la katei ka synjuk ki nongkhwai ka la trei shitom ban peitngor bad ban ym ailad ïa kino kino ki briew kiba thmu ban pynïap ïa ki doh kha doh pnat ha katei ka wah bad ki shnat jong ka hynrei teng teng ki dang don ki riew shim kabu kiba pynkheiñ bad kiba ïaleh pyrshah. Kumta ban nang pynkhlaiñ shuh shuh ïa ka jingtrei kam ha kine ki snem ki la don sa artylli ki seng kata ka seng ki trai khyndew Nonglang Punmgsier ba ka seng ki trai khyndew Nongstong.
Ka jingïasnoh kti lang jong kitei ki seng trai khyndew ka la nang ai mynsiem shuh shuh ïa ki nongïalam bad ki dkhot jong ka NPAA. U Bah K.B.Syiemlieh president ka NPAA, bad u Bah Usefulson Wanñiang Secretary ka seng ki trai khyndew Nongstong haba ïakren bad u nongthoh khubor ki la ong na ka bynta ban pynïaid beit ïa ka jingtrei kam ki la thung da ka Joint Committee khnang ba ka jingtrei kam kan kham khlaiñ shuh shuh.
Kitei ki nongïalam ka Joint Committee ki la ong ruh ba ka jingpynïap pathar ïa ki don um ha ka wah Tyrsung bad ki shnat jong ka, ka jingsiat pathar ïa ki mrad ki mreng, ka jingthang dusmon ïa ki lum bad ki khlaw la duna bha. Nalor kata ki la ong ba nangne shakhmat kin nang pynkhlaiñ shuh shuh ban peitngor ba kin ym don shuh kino kino ki riew shim kabu ban pynïap pathar ïa ki mrad ki mreng, ki sim ki doh bad ki doh um doh wah.
Ki la ong ruh ba lada ki ïoh jingtip ba ki don ki dak ki shin ha ki wah kin buddien bniah haduh ban lap ïa kiba don kti bad lada lap kin pynshitom da kaba tyngeh kumba la buh da ki sign board harud ka surok bah ba la thoh ruh ha ki maw ha shilynter ka wah Tyrsung.
