Plie u Myntri Rangbah ïa ka ïingdorbar, ka ophis thymmai jong ka Nongstoiñ Block bad PH Pyndenglawar

By Mawphor Editor On Apr 16, 2026

Nongstoiñ, Ïaïong 15 : Ka jingpyndep jong ka shnong New Nongstoiñ ïa ka ïngdorbar kaba thymmai kaba la shna ha jrong jong ka mala kaba lai jong ka Market Complex ka la ong ka jingkyrkhu kaba khraw ym tang ïa ka dorbar shnong hynrei ïa kino kino ki riew shimet, ki kynhun ne ki seng kiba mut ban pynlong ïa ki jingïalang. Ka dorbar shnong hadien ba ka la dep ban pynbit pynbiang ïa katei ka ïng dorbar ka la khot ïa u Conrad Konggal Sangma Myntri Rangbah ka jylla ba un wan plie ïa katei ka ïngdorbar shuwa ba ka shnong kan pyndon kam. Kumta ha kane ka sngi Balang ka 15 tarik Ïaïong u Myntri Rangbah u la hiar sha Nongstoiñ na ka bynta ban plie ïa katei ka ïngdorbar. Ha katei ka sngi u Myntri Rangbah u la leit jngoh ruh ïa ki nongshong die madan ha khmat ïew Nongstoiñ bad hadien kata la pdiang sngewbha ïa u da ki paitbah nongshong shnong , ki ophisar na ki tnad trei kam jong ka sorkar.
Hadien ba la dep ban plie ïa ka ïngdorbar la pynlong ïa ka jingïalang ba lyngkot ha kaba la pynïaid da u bah G.Marbañiang secretary ka shnong New Nongstoiñ bad la ïoh ïa ka jingkren lyngkot na u bah Gabriel Wahlang MLA ka 32 Nongstoiñ constituency.Ha katei ka jingïalang la ïadon ryngkat ruh da ka Smt Hemanayak IAS Deputy Commssioner ka West Khasi hills, u bah Sraly Rashir sordar jong ka shnong New Nongstoiñ uba dei ruh u MDC ka Mawhynrut constituency bad ki heh sorkar na ki tnad trei kam bap her bap her jong ka district.Khatduh eh la ïoh ïa ka jingkren na u Conrad Kongal Sangma Myntri Rangbah ka jylla uba long u kongsan.
Ha kajuh ka sngi hadien ka jingïalang plie ïa ka ïngdorbar u Myntri Rangbah u la leit ban plie sa ïa ka Prime Hub kaba don ha ka shnong Pyndenglawar harud ka surok Nongstoiñ Shillong. Katei ka Prime Hub ka dei ka jaka ban ai jinghikai ïa ki paitbah nongshong shnong ha kiba bun ki bynta kum ha kaba shna ïa ki tiar ki tar, thaiñ jingthaiñ, shna umsoh, kumjuh ruh ban ai jinghikai ha ka rep ka riang bad kiwei kiwei.
U Myntri Rangbah haba ai jingkren ha ka jingïalang ha phyllaw jong katei ka Prime Hub u la ong ba hadien ba la plie ïa katei ka jaka kam dei shuh ka jong ka sorkar hynrei ka la dei ka jong ka shnong kumta ki paitbah nongshong shnong ki dei ban lehkhuid bad sumar bha ïa ka .U la ong ruh ba ha katei ka jaka kin don ki nongtrei ki ban ïarap ïa ki nongshong shnong kiba wan wad jingtip kumno ban trei seng kam la jong na kabynta ban kyntiew ïa ka ïoh ka kot bad ka kamai kajih.Ha kajuh ka por u la ong ba lada don ki nongshong shnong kiba la dep pyntbit ha kino kino ki kam lyngba katei ka Prime Hub ka sorkar kan sa thaw ki lad jingïarap na ka bynta ban pynïaid ïew ïa ki tiar ki tar bad ki mar ki mata ba ki pynmih .
Hadien ba la dep ban plie ïa ka Prime hub ha Pyndenglawar u Myntri Rangbah u la leit ban plie sa ïa ka ophis ba thymmai jong ka Nongstoiñ C& RD Block. Ïa katei ka ophis ba thymmai jong ka Nongstoiñ C &RD Block la shna kham sha jrong khyndiat ïa ka ophis kaba rim ha ka jaka kaba bih ba biang bad kaba kylluid bad kaba pyngad bad kaba itynnad bha.
Ha ka jingleit ban plie ïa katei ka ophis ba thymmai jong ka Nongstoiñ Block la pdiang sngewbha ïa u Myntri Rangbah da u bah E.Lyngdoh MCS Block Development Officer ryngkat ki staff jong ka Block. Ha katei ka sngi shuwa ban pynlong ïa ka jingïalang ha kaba la pyn da u bah E.Lyngdoh MCS Block Development Officer bad ha kajuh ka por la plie ïa u maw kyrteng jong ka Block Ophis da u Myntri Rangbah uba long u kongsan ha katei ka sngi. Hadien ba la dep ban plie ïa u mawkyrteng la sdang ïa ka jingïalang ha kaba la ïoh ïa ka jingkren pdiang na ka Hema Nayak Deputy Commssioner jong ka West Khasi hills.
Ha kajuh ka por la ïoh ïa ka jingkren lyngkot na u bah Gabriel Wahlang MLA uba long u symbud kongsan.U bah Wahlang haba ai jingkren ha katei ka sngi u la ai khublei ïa ka sorkar kaba la lah ban pynurlong ïa kiba bun ki kam pynroi hapoh ka Nongstoiñ constituency , ha ka district bad ha ka jylla baroh kawei.U la ai khublei kyrpang ruh ïa u Myntri Rabgha uba la shimkhia ban pynurlong ïa ka jingangnud jong ki paitbah ban pynheh ïa ka surok na Nongstoiñ sha Sohpian ha kaba ka sorkar ka la dep ban mang pisa haduh 22 klur tam .Khatduh eh la ïoh ïa ka jingkren na u Conrad Kongal Sangma Myntri Rangbah uba long u kongsan.
U Myntri Rangbah haba ai jigkren kum u kongsan u la ong ba ka sorkar MDA ha kine ki phra snem tam ka la pyrshang katba lah ban pynurlong ïa ki jingangnud jong ki paitbah hynrei haduh mynta ym shym pat la lah ban pyndep lut.Wat la katta ruh ka sorkar kam shym la shong thait ban trei na ka bynta ka jingmyntoi jong u paitbah ka jylla.
Ha kaba ïadei bad ka jingplie ïa ka ophis ba thymmai jong ka Nongstoiñ Block u Myntri Rangbah ua la ong ba ka Block ka dei ka jaka treikam kaba donkam haduh katta kta namar ba ki nongtrei ha ki block ophis kata naduh ki nongtrei ha ki kyrdan kiba rit haduh ki ba kham heh ki hap ban trei na ka bynta ki paitbah nong shong shnong kiba dei na ki nongkyndong bad ki dei ruh ki kam ba ki nongtrei ki hap ban da peit bniah bha .U la kyntu ruh ïa baroh ki nongtrei ha ki Block ophis ba ki dei ban long kiba ïaishah , kiba sbun bad kiba lah ban pynïadei bad ki paitbah khnang ba kan ym don kano kano ka jingsahteng jong ki kam.