Ha Mairang pynshai paidbah ka KAS ban pynlong ïa ka ktien Khasi kum ka ktien sorkar

Nongstoiñ, Ïaïong 14: Ka jingdawa jong ka Khasi Authors Society ïa ka sorkar ba kan pynlong official language lane ka ktien sorkar ïa ka ktien Khasi hapoh ka jylla ka la nang suh thied ha kylleng ki jaka hapoh ka jylla ha kaba ki paidbah ki la nang sngewthuh shai ba ka port ka la dei ba ka ktien Khasi la dei ban pynlong noh kum ka ktien sorkar hapoh ka jylla. Kumta na ka bynta ban pynkhlaiñ shuh shuh ïa ka jingdawa ki nongïalam jong ka seng ha kane ka sngi hatmajai ki la hiar sha Mairang Eastern West Khasi Hills ban pynlong ka jingïalang paidbah halor ka jingdawa ban pynlong ïa ka ktien Khasi kum ka ktien sorkar ha ka jylla bad ba ka sorkar India kan pynrung noh ha ka Khyrnit ba phra jong ka riti synshar.
Ha katei ka sngi la pynlong ïa ka jingïalang ha Tirotsingh Memorial hall Pyndengumïong (Mairang) ha kaba la pynïaid da u Dr. Overland Lyngdoh ha ryngkat ka jingïadonlang jong ki nongïalam jong ka sengkmie ba kynthup ïa u Professor Desmond L .Kharmawphlang, Bah Danielstone Lyngdoh Nonglait uwei na ki nongsaid aiñ jong ka Supreme Court ba donburom u Dr. D.R.L. Nonglait President rangbah jong ka seng ki nongïalam bad ki dkhot jong ka shnat Mairang, ki Nonghikai bad ki samla pule jong ka Tirotsing Memorial College Mairang, u Bah Bernard Syiem?ong sordar jong ka shnong Pyndengumïong ki nongïalam jong ki sengbhalang ba kynthup ïa ka FKJGP, KSU, HYC, HANM bad HITO.
Ha katei ka sngi la ïoh ïa ka jingkren na u Bah Bernard Syiemïong, ki nongïalam jong ki sengbhalang, na u Professor Desmond L. Kharmawphlang.
U Dr. D.R.L. Nonglait president u la ong ba halor katei ka mat u la ong ba lada ka sorkar ka mon kam don jingeh satia ban pynlong ktien sorkar ïa ka ktien Khasi namar katei ka mat kaba donkam haduh katta katta hynrei na ka sorkar jylla kam shym la shimkhia ban pynlong ïa ka ktien Khasi kum ka ktien sorkar.
U la ong ruh ba lada phai sha kiwei ki jylla kiba don ha ka thaiñ shatei lammihngi jong ka ri India kum ka Mizoram ka la pynlong ktien sorkar ïa ka ktien Mizo naduh u snem 1972 ha kaba por ba ka dang long tang ka Union Teritorry bad wat haba ka la ïoh ïa ka jylla ba pura ruh ka pyndonkam beit da ka ktien Mizo ha baroh ki tnat treikam jong ka sorkar bad ki heh ki haiñ jong ka Mizoram haba don ki jingpynbna paidbah lane ki jingïalang ki pyndonkam beit da ka ktien la jong kum ka ktien sorkar.
Ha kaba ïadei bad katei ka jingdawa u Dr. Nonglait u la ong ruh ba ka seng ka dawa ruh ïa ka sorkar ba kan pynlong da ka jingïatai ba kyrpang hapoh ka Ïingdorbar Thaw Aiñ na ka bynta ban Amend ne mynjur ban kyntiew noh ïa ka ktien Khasi kum ka Official Language lane ka ktien sorkar bad ha katei ka jingïatai ba kyrpang ka sorkar ka dei ban khot lang ruh ïa ki nongïalam ka seng ban ïadonbynta lang.
Nalor kata u la ong ruh ba ha kine ki bnai ba la dep ka seng ka la pynkynmaw ïa ka sorkar lyngba ki jingthoh ba ka dei ban shim khia halor katei ka mat jingdawa. Kumta halor katei ka mat jingdawa u Dr. Nonglait u la ong ba ka seng kam lah shuh ban shu ap sah da ki phew snem bad ban shu pyrta ïa kajuh shi kajuh khlem sei soh. Ha kajuh ka por u la ong ba katei ka mat jingdawa kam dei kawei satia ka mat tang na ka bynta jongno re hynrei ka dei ka mat ba ka jaitbynriew ka donkam eh.
Kumta u la kyntu ïa ki paidbah, ki sengbhalang, ki seng saiñ pyrthei ba kin ïasnoh kti lang bad ka seng na ka bynta ban pynurlong ïa katei ka jingdawa namar lada ïa ka ktien Khasi la ithuh kum ka ktien sorkar kan long ka jingmyntoi kaba khraw ïa baroh ki paidbah nongshong shnong jong ka bri u Hynñiewtrep.
Khatduh eh u la ong ba na ka liang ka seng ka ai por ïa ka sorkar ba hapoh u bnai Ïaïong ka dei ban pynurlong ïa katei ka jingdawa bad lada ka sngap mynthi ka seng kam banse ban shim da kiwei pat ki sienjam kiba kham tyngeh.