Kular u ma Sñiawbhalang ïa ka skim ba 15 lak tyngka ïa ka Seiñ Raij Shnong Jalaphet

Khliehriat iaiong 12: U Sumbud Myntri rangbah ka jylla Meghalaya, u bah Sñiawbhalang Dhar, hynnin ka sngi saitjaiñ haba kren kum u Kongsan ha ka lympung shad sukara jong ka Seiñ Raij Shnong Jalaphet, East Jaiñtia Hills District u la kular ban wanrah ïa ka skim kaba T15 lak tyngka ban kyntiew ïa ka skul jong ka Seiñ Raij Shnong Jalaphet, shuh shuh ruh u la pynbna bad pynsngew ïa ka mang tyngka na ka bynta ban shna ïa ka surok.
Haba kren ha kane ka leh niam shad sukara, u kongsan u la ai ka jingkhublei shad Sukra ba suk ba kmen ïa ki paidbah ka Seiñ Raij Shnong Jalaphet bad u ai ka jingiaroh ïa ka jinglong ryntih bad jingia long shitylli bad ong ruh ba ka leh niam Behdiengkhlam kumjuh ruh ka leh niam shad Sukara katba nang mih ki snem ka nang wandur, ka nang phuh nang phieng ha ki khor, ki khriam, ha ka kup, ka sem kaba pyni shynna shisha ïa ka jinglong ba kor ba kyrpang ka riti ka dustur kaba dang im haduh mynta, la ong ruh ba ka shad sukara, ka behdiengkhlam ka pyni ïa ka jinglah ban pynneh ïa la ka lariti, u la bynrap ruh ba ka jingleh niam kaba na ri lum Jaiñtia ka dei kaba la ithuh bad tip ruh da ka tnat jngohkai pyrthei bad la tip ruh da ka ri hi baroh kawei khamtam ka jingshad pliang ne ka plate dance, u la ong ruh ba ka sukara ka dei ka jingleh niam kaba ju leh man la u snem kaba naduh ki por hyndia la ju leh ha shwa ba ki briew kin hiar sha ki lyngkha rep ban sdang ban rep ban bet ïa u symbai ha ka mei ram ew bad kane ka jinglehniam ka don ka jinglong ba phuh ba phieng kaba iaid ryngkat bad ka riti ka dustur.
Ha kaba ïadei bad ki mang tyngka ban shna ïa ka surok, u bah Sñiawbhalang Dhar, u la ong ba ka la don ka mang tyngka kaba T. 345 klur tyngka na ka bynta ban shna ïa ka surok kaba naduh Lad-Sutnga sha latyrke ter ter shaduh Saipung bad halor kane shen yn sa wan ban plie noh ïa u maw nongrim, kane ka surok ka dei kaba don haduh 60 kilo mitar tam ka jingjngai bad kane ka dei ka jingpynurlong ïa ka jingkular jong u bad ka MLA, ka kong Santa Mary Shylla kaba ki la kular myn ha ka por ba ki ialap election, u la ong ba mynta u dang phah biang sa kawei ka proposal na ka bynta ban shna ïa ka surok kaba na Samasi sha Kseh bad kane ka surok ka lah ban pyniasoh bad ka West Jaiñtia Hills District.
U Kongsan u la ai ka jingiaroh ïa ka MLA Sutnga-Saipung, ka kong Santa Mary Shylla bad ong ba ka dei ka nongmihkhmat kaba trei shitom bha bad kaba don ka mynsiem ban kyntiew ïa ki shnong ki thaw kiba don hapoh ka constituency jong ka.
Na ka liang u bah Wom Chyrmang uba dei u President Sein Kyntu Seiñ Raij 12 Doloi, u la ai ka jingkhublei sngewnguh ïa u Kongsan u bah Sñiawbhalang Dhar, uba la pdiang ïa ka jinglhot ka Seiñ Rain Shnong Jalapher bad pyllait por khnang ban wan sha kane ka lympung shad sukara, u la ai ruh ka jingkitbok kitrwiang ïa u kongsan.
U bah Wom u la ai ka jingkhublei ruh ïa ka Seiñ Raij Tuber kaba la ai ka lad ïa ki Seiñ Raij Shnong ban pynlong ïa ki Shad sukara hala ki jong ki shnong ha shwa ba ki briew kin hiar sha ki lyngkha trei, u la ong ruh ba kane ka shad sukara ka iaid lang ryngkat bad ka jingleh niam ha ka kñia ka khriam kaba ki kong ka kñia ryngkaw, ka kñia raid kaba ki ju leh man la u snem ha shwa ba kin sdang ïa ka rep ka riang.
Kiba la ai jingkren ki kynthup ruh ka MLA Sutnga Saipung, ka kong Santa Mary Shylla, Waheh Shnong Jalaphet, bah Lambha Chyrmang, u Secretary Shnong Jalaphet, u bah Kritic Chyrmang, President Sein Raij Jalaphet, u bah Wanki Chyrmang bad kiwei kiwei.
Ha kane ka lympung shad sukara ha Jalaphet la ïa don ryngkat lang ruh u Deputy Commissioner ka East Jaiñtia Hills District, u Manish Kumar, IAS, u Superintendent of Police, u Pankaj Rasgania, IPS, MDC Sumer Constituency, bah Krison Langstang lem bad ki riew rangbah kiba na ki shnong bapher bapher kiba na jan bad na jngai.
Shuh shuh ha kane ka sngi, ka Sieñ Raij Shnong Jalaphet ka la pynkup burom ruh ïa ki khun samla kiba napoh ka Seiñ Raij kiba la leh bha ha ki jingpule jong ki, kiba la shah pynkup burom ki kynthup u Dr Hepstar Chyrmang, uba la pyndep ia ka jingpule doctor MBBS, u samla Arnidawan Bareh, uba la pyndep ia ka jingpule B.Tech- Civil engineering, ka samla Thailang Chyrmang, kaba la pyndep ia ka kyrdan LLM- Advocate, ka samla Rapbha Chyrmang, kaba pyndep ia ka jingpule LLM- Advocate bad ka samla Mai Syrti kaba la pyndep ia ka jingpule GNM.
La sakhi ruh ba ka lympung shad Sukara ha Jalaphet ka phuh ka phieng ha ka shad ka kmen ha ryngkat ki jingsawa ki sur Sukra ba bang.