Ban pynneh ïa ka riti dustur jong ka Ri Lyngngam, pynlong ka ALO da ka 1st Dongrynñiaw Festival 2026 ha Nongjri

Mawkyrwat, Ïaïong 12: Kum shi bynta ban pynkhie im ïa ka riti dustur jong ka Ri Lyngngam bad kumjuh ruh ba ka pateng ban sa wan kan ym klet ïa ki, ka All Lyngngam Organization ne ALO ha ki ar sngi lynter ka la ïoh ban pynlong ïa ka tamasa lehkmen kaba ki la ai kyrteng ka ‘1st ‘Dongrynñiaw Festival 2026’ ryngkat ka phang kaba long, “A Journey ends, but the Tradition lives on”, ba la pynlong ha madan Nongjri, kaba hap hapoh jong ka Ranikor Civil Sub Division, South West Khasi Hills District.
Lah ban kdew ba kane ka tamasa lehkmen ba ar sngi kaba la jer kyrteng ka 1st ‘Dongrynñiaw Festival 2026, kum ka organization ka la ïoh ban pynïalehkai ïa ki jingïalehkai tynrai kum ka syn-tyngkoh, ka mawpoiñ, ka jingkynud sur da kaba shu siaw ne rwai su-su, ka jingput da u ksai ha ka shyntur ne put bong-bna, ka put tang-hyllot, ka khlong-tham, ki jingrwai bad jingshad tynrai jong ka Ri Lyngngam bad kiwei de ki jingpynbyrngia ha kaba ïa ki nongjop baroh la ïoh ban ai ha ki ïa ka khusnam da ka syrnod ryngkat ka song pisa.
Ïa kane ka 1st ‘Dongrynñiaw Festival 2026 la sdang naduh ka 10 tarik u Ïaïong, 2026 ha kaba la wan ban plie pyrda da u bah Gigur Myrthong, MLA bad MDC ba rim jong ka Mawshynrut Constituency kum u kongsan ha ryngkat ka jingdonlang ki jait jingïalehkai, ki jingshad, ki jingrwai bad jingpyni ïa ki jingshad tynrai kiba pher bapher kiba pynshongshit bad pynkmen ïa ki paidbah nongwan peit kai.
Ha ka sngi ban pynhap pyrda ïa kane ka 1st ‘Dongrynñiaw Festival 2026, u kongsan u dei u bah Methodius Dkhar uba dei u Myntri ba dei peit ïa ka Co-operation Department, Department of Labour, Employment & Skill Development, Food Civil Supplies & Consumer Affairs Department, Registration & Stamps Department jong ka Sorkar Meghalaya bad u bah Pius Marweiñ uba dei u MLA ka Ranikor Constituency kum u Symbud Kongsan.
Haba kren ha ka jingïalang, kum u kongsan u bah Methodios Dkhar ula ai ka jingïaroh ïa ka All Lyngngam Organization ne ALO kaba la pynlong ïa kum kine ki jinglehkmen ne ki tamasa namar ym dei kum ki tamasa kiba shu pynkut kai ïa ka pisa tyngka hynrei ki dei shibynta jong ki tamasa ban wanrah ïa ka jingïalong shitylli, jingïalong kawei, jingïa-ithuh i-thaw, jingïasngewjan kum shipara kham kyrpang eh ban pynkynmaw ne pyni ïa ki sap tynrai naduh ki jingïalehkai, ka rwai ka siaw, ka put ka tem bad kiwei de.
Ha kajuh ka por, u bah Methodios u la pynpaw ruh ka jingkhublei ïa u bah Pius Marweiñ u MLA jong ka Ranikor Constituency uba don shisha ïa ka jingkitkhlieh ymtang ban pynneh pynsah ïa ki riti ki dustur hynrei ïa ka roi ka par hapoh ka konstitwensi hi baroh kawei bad kumjuh ruh ula ai ruh ka jingïaroh ïa ki nongïalam jong ka All Lyngngam Organization kiba dei ki nongprat lynti bad ki nongseng nongdang ïa ka kiba la don shisha ïa ka jingthmu ban pynim pynsah ïa ki riti ki dustur jong ki jaitbynriew Lyngngam baroh kawei ha kaba kane kan long shisha ka nuksa kabab ha ïa kiwei ki de jaidbynriew ba ki dei ban tip bad pynneh pynsah ïa la ka riti.
Shuh shuh ha ka jingkren jong ula ai mynsiem ruh ba kum ki nongshong shnong naduh ki longkpa ki longkmie bad ki samla ki dei ban sngewthuh ba kane ka tamasa ka dei kawei na ki lad ba kin pynpaw pyrthei ba ka jaitbynriew Lyngngam ka don ha la ka jong ka niam tynrai nalor kiwei jaitbynriew kiba shong ba sah ha ka Jylla Meghalaya namar lyngba ki kpa tymmen kiba mynshwa ki la pyni lynti kumta ai ba kane ka pateng ba mynta kan pynkhie im biang ïa la ka jong ka tynnrai khnang ba ki longdien mandien kin dup tip ïa la ki jong ki tynrai la jong kum ki jaitbynriew Lyngngam.
U bah Pius Marweiñ uba dei u MLA & MDC ka Ranikor Constituency kum u symbud kongsan ha ka jingkren jong u, u la pynpaw ka jingkmen ba kane 1st ‘Dongrynñiaw Festival 2026 ka don ha ka ïa ka thong ba hakhmat eh ban pynim bad ban pynneh pynsah ïa ka riti ka dustur jong u mynbarim khamtam eh ïa ka riti ka dustur jong ka Ri Lyngngam baroh kawei naduh ka shad tynrai, la riam ka beit tynrai, ka ktien ka thylliej, ka bam ka dih tynrai bad ban pynneh pynsah ruh ïa ka ka spah ka phew bad kiwei de ki bynta.
Ha ka juh ka por ula ong ruh ba ïa kane ka ‘Dongrynñiaw Festival 2026 ym dei ba ki pynlong tang mynta u snem hynrei nangne shakhmat na ka liang ka All Lyngngam Organization kan sa ïoh ban bteng bad pynlong shuh shuh khnang ba kan long ka lad ban pynkhie im biang ïa ka riti ka dustur jong ka Ri Lyngngam.
Ïa kane ka tamasa la pynshit pynshngaiñ lyngba ki jingrwai na ka kynhun jong ka Khmieh Creative Society.
Kiwei de kiba la don lang ki long ha kane ka sngi ki long u bah Bostic Mawsor uba dei u President jong ka All Lyngngam Organisation, u bah Bendrowel Hahshah, Secretary jong ka All Lyngngam Organisation, u bah Waiting Mawsor bad kiwei de ki dkhot ka All Lyngngam Organisation, ki riew rangbah ba la shah khot sngewbha.