Shillong, Ïaiong 11 : Ka Synod Sepngi kaba long ha Rangshken naduh ka 05tarik haduh ka 08tarik u Lber ka la buh dak sah jingkynmaw namar dei lyngba ka jingwan jong ka Synod ba ka thain ka la ïoh ruh ban pdiang ïa ka surok kaba paka kaba kylla long pat ka jingmyntoi ïa ki paidbah nongshong shnong.
Kum ka dak ka jingsngewnguh na ka liang ka Balang kumjuh ka shnong ki la pynpaw ïa ka jingsngew burom kaba khraw ïa u Myntri Rangbah ka Jylla Conrad K Sangma bad khamtam eh ïa u Commissioner and Secretarty ka sorkar u Vijay Kumar IAS kiba la pynurlong ïa kane ka surok ha shwa ban wan ka Synod.
Na ka liang ka Balang ka ai ruh ka jingïaroh ïa u Bah Khraw Thabah uba pyntrei stet bad pyndep kyrkieh ïa katei ka surok tang hapoh lai taiew.
Kumta, kum ka dak ka jingplie paidbah ïa kane ka surok, na ka liang ka shnong ka la pynlong ïa ka jingïalang kaba lyngkot hadien ba u Commissioner and Secretary ka sorkar u Vijay Kumar ryngkat ki nongïalam shnong kumjuh na ka Balang, nangta u Director ka tnad C&RD u SC Sidhu bad ruh ka BDO Mawphlang ha ka 09tarik ki la dep ban plie ïa katei ka surok ha Rangskhen.
Ha kane ka jingïalang ki nongïalam shnong ki la pynpaw ruh ha u Commissioner and Secretary ïa kiba bun kiwei pat ki jingdonkam jong ka shnong.
