Shillong, Naitung 14: Hadien ba ka Food Safety and Standards Authority of India (FSSAI) ka ai ïa ka jingbtah ïa ki dukan die doh ba kin khang shuwa ki dukan jong ki bad ba kin pynkhuid bad shna thymmai kat kum ka rukom kaba ki ai, ki nongdie doh ha Ïewduh bad ha shi lynter ka surok ha ki thaiñ Motphran naduh 13 tarik naitung haduh 15. Ha ka jingleit peit u nonglum khubor u Mawphor la sakhi ba baroh ki dukan ki sahngeh shuwa kumba la bthah bad ki ban pynkhuid shuwa ïa ki dukan die doh da kaba ai rong ai rup bad ban ker ïa ka jaka buh doh da ki jar nar. Lah ban sakhi ba hadien kane ka jingairong airup bad ka jingpynbha baroh ki basa lah ban sakhi ba dei ka basa doh kaba khuid bad kaba itynnad tam na baroh ki basa ha ïew
Ki katto katne ngut ki nongdie kiba buh dukan kiba u Mawphor u ïoh ban ïakren ki la pynpaw ïa ka jingsngew ïahap namar kane kan wanrah jingkhuid shikatdei ïa ka doh kaba kin die. Kine ki nongdie doh ki la ïathuh ba da kane ka jingkah da ki jar nar kan kham wanrah jingkhuid namar ki nongwan siew wan tda kin ym ïoh lad shuh ban ktah ïa ka doh kumba jia baroh shikatto.
Haba pyrshang ban kylli pat ïa ka jinglut jingsep ha kaban shna pynbha kiba bun na ki ki pynpaw ba ka jinglut kam duna ïa ka 5000 hajar namar kin hap thied ïa ka rong, ki tin, ki dieng bad kiwei de ki jingdonkam. Shuh shuh ki pynpaw ruh ba lada ka sorkar ka ïai pynmih ïa shibun ki kyndon aiñ kan buh jingeh ïa ki bad kan ktah ruh ïa ka pla jong ki, namar mynta lai sngi kin hap khang shuwa ka dukan jong ki.
Haba la kylli pat haduh lano kin lah ban pyndep ban shna ïa ki basa, na ka liang jong ki ki pynpaw ba la kumno kumno la sngi Thohdieng ki la dep pura bad ki kyrmen ba ha ka sngi Saitjiañ kin lah ban plie biang ïa ki dukan jong ki.
Haba pyrshang ban kylli pat halor ka jingthmu ka FSSAI ban hukum ba ki dukan doh kin pynbiang ïa ki Fridge ban buh ïa ka doh kiba bun ki pynpaw ba lada kan mih jingeh shibun namar ka dei ka mar kaba rem dor bha bad ba ki dukan kiba ki shong kim long kiba shngaiñ ban buh miet ïa kat kata ka tiar.
“Nalor ba ka ïew bad ka kamai kam biang lada kin pynmih ïa kat kata ka hukum kan ktah shikatdei namar ka jinglut jingsep baroh ngi hap buria da lade nalor ba ngi hap ban siew ka bai dukan sa ban thied ïa kat kata” ong uwei na ki nongdie doh.
Haba pyrshang pat ban kylli ïa kaei ka jingduna kaba ki lap kum i nongshong dukan ha basa die doh, na ka liang jong ki la ïathuh ba ka jingbym don ka kor um kaba kin ïoh ban rah um na bynta ban sait ïa ka dukan bad ka jingbym don ki jaka bret ñiut ka dei ka jingeh kaba ki ïa kynduh bad kii la buh ïa kito kiba don ha ka bor ba kin peit ïa kane ka bynta.
Haba pyrshang ban ïakren pat bad ki katto katne ngut kiba shong die doh syiar ha Them Ïewmawlong ki la ïathuh ba dang shen ka Commissioner jong ka FSSAI ka la ong ba ym shah shuh ïa ki ban buh dukan ha katei ka jaka namar kam long ka jaka kaba khuid namar ka jingdon ka jaka bret ñiut ha syndah kitei ki dukan.
Shuh shuh na ka liang kine kiba die doh hangne ki la pynpaw ïa ka jingeh lada ka sorkar kam shah shuh ban shong dei doh ha kane ka jaka namar ki la shong die doh ha kane ka jaka la bun bun snem mynta.
Shuh shuh ki la ong ba ka ka jingbthah ban ker ïit ïa ka jaka buh doh ka ïarap ban wanrah ïa ka jingkhuid hynrei namar ba set op palat ka lah ban sma ka doh.
