Pynkhreh ka BJP Meghalaya ban pdiang ki jingkular u Modi ban pynkupbor ïa ki longkmie, ong ka Kong Arena

Shillong, Ïaïong 11: Ha ka sngi rakhe ïa ka sngi Shad Suk Mynsiem, ka BJP Meghalaya ruh ka la rakhe ïa ka sngi jong ka jingsuk jingsaiñ bad ka jingkiew shaphrang ka jylla bad ka la pynkhreh ruh ban pdiang ïa ka jingai sngewbha jong ka jingpynkup bor ïa ki longkmie kumba la kular da u Myntri Rangbah duh ka ri u Narendra Modi. Ka party ka ong ba ka la dei ka por ban pynkhlaiñ ïa ka riti synshar paidbah lyngba ki riti dustur bad ban ai shuh shuh ka jingkyrshan ïa ka jingïalong ba ïaryngkatlang jong baroh.
Lyngba ka kyrwoh ba la phah da ka Kong Arena Hynñiewta President Mahila Morcha BJP, Meghalaya Pradesh ka la ong ba ha ka ri India kyrpang ha Meghalaya, ki long kmie ki la mih shakhmat ban trei ki kam kiba kongsan bha hapoh ka imlang sahlang. Ka la ong ba ki longkmie ha Meghalaya ki la long hakhmat eh ban trei na ka bynta ka jingkiew jong ka jylla ha kaba la ïohi ba bun na ki longkmie ki la paw ha ki kyrdan bapher bapher kum ka kam pule doctor, ha ki kam pule puthi, ki administrator, ki muktiar, ki nongthoh khubor bad ha baroh ki kam kiba la pyrkhat na ka bynta ka bha ka miat.
“Ka jingbha ha ka pule puthi, ka lad ai jingsumar bad ki skhim ai jingïarap pisa, ba la wanrah da ka sorkar BJP ha ka sorkar pdeng kaba la pynthikna ïa ka jingkiew jong ki longkmie ha baroh ki liang; kum ka longkmie nga ai khublei ïa u Myntri Rangbah duh ka ri u Narendra Modi na ka bynta baroh kaba u la leh na ka bynta ki longkmie,” ong ka Kong Hynñiewta.
Ka la ong, “U Myntri Rangbah duh u ngeit ba tang ka jingkiew ha ka ïoh ka kot bad ka pule puthi kam pat long kaba biang na ka bynta ki longkmie. Katba ka jingmih shakhmat jong ki longkmie ha ki por elekshon ka la nang ïai bteng ban kiew sted, ka jinglong nongmihkhmat jong ki longkmie ha ki state legislative assembly bad Parliament kan dei ban nangbun shu shuh. Ki sorkar kiba la leit ki la kren bad ki la nang tang ban kren shaphang ka jingai ki hok sha ki longkmie ban long ki nongmihkhmat hapoh ka ri synshar paidbah. La thaw ïa ki Committee, la shna ïa ki bill kiba la wanrah hynrei kim ju ïohi ïa ki kam kiba shisha. Ka la dei ka por ban leh da ka kam bad ban pynthikna ïa ka jingïoh bhah ki longkmie ban long ki nongmihkhmat ha ki por elekshon. Ka Narishakti Vandan Adhiniyam (Saluting Woman Power Act) ka tyrwa ïa kane ka lad ka kabu. Kaei kaba ngi leh na kane kan pynwandur ïa ka jinglong jong ka ri synshar paidbah jong ngi ha ki snem ban wan,” ong ka Kong Hynñiewta.