Lyngba ka ULLAS angnud ka sorkar jylla ban ailad ïa ki nongshong shnong ban kiew ha ka thoh ka tar, ong u Conrad

Shillong, Ïaïong 11: U Myntri Rangbah ka Jylla Conrad K Sangma ula ong ba ka Sorkar Jylla ka don ïa ka jingthmu kaba shibun bha ha ka jingtreikam ban kynthup lang ïa baroh kiba ïadei bad ki lad jingmyntoi ïa ki nongshong shnong.
Haba ai jingkren ha ka ULLAS Fest 2026 ba pynlong ha U Soso Tham Auditorium, u Conrad ula ong, “Nga pynkup burom ïa ki topper ka eksam SSLC bad watla ki dei kiba kongsan bha kumjuh ruh ka long ïa ki rangbah ki bym pat nangthoh nangpule, hynrei kiba angnud ïa kane, bad, lada ngim lah ban ktah ïa ka jingim jong kine ki briew, ka kam jong ngi kan long ka bym dep pura.”
Ha kane ka jingïalang kiba ïadonlang ki dei u Myntri ka tnad Pule Puthi Bah Lahkmen Rymbui, u Commissioner & Secretary Vijay Mantri nalor ki Ophisar ka Tnad Pule Puthi, ki Nonghikai, ki nongjop ka ULLAS bad kiwei kiwei.
Ha kaba ïadei bad kane na ka liang jong u Myntri Rangbah ula pynpaw ba ka ULLAS ka dei ka prokram kaba donburom bad ong ba bun ki briew kim don ïa ka kabu ban long kiba la nang thoh nang pule hynrei kane ka prokram ka la poi sha kito kiba angnud ban pule bad thoh. Ula kyntu ïa baroh ba kin ïatreilang ha ka ban lah kynjoh ïa ka jingdon ki briew ba la nang thoh nang pule sha ka 100%.
“Ngi la jan kot ïa ka 100% ka jingdon ki nongshong shnong ba nang thoh nang pule hynrei ngi hap ban ïatreilang kum ka imlang sahlang ban wanrah jingkylla ha ka pule puthi haba pynkupbor ïa baroh ki briew ha ka imlang sahlang,” bynrap u Myntri Rangbah.
Na ka liang u Myntri Rangbah bad kiwei ki kynrem ki lyndan, kila pynkup burom ïa ki ULLAS Achievers bad ki ULLAS learners kiba la rangbah duh ka rta na ka thaiñ Khasi bad Jaiñtia.
Ka ULLAS (Understanding of Lifelong Learning for All in Society) scheme ka dei ka prokram ka Sorkar Pdeng jong u snem 2022-2027 ban kyntiew ïa ka pule puthi bad ka jingai jinghikai ïa kiba la rangbah kiba la 15 snem shaneng, kiba duh ïa ka lad ban leit skul.