Nga tur hi shaduh ki kamra ki myntri sorkar pdeng ban ïoh ïa ka surok ha ki jaka shipai, ong u Bah Sanbor

Shillong, Ïaïong 11: U MLA ka 19th South Shillong Constituency bad u Myntri ka Sorkar jylla uba khmih ïa ka Tnat Arts and Culture u Bah Sanbor Shullai u la ong ba da ka jinglah ban shim khia hi bad ban leit tur shaduh ki kamra jong ki Myntri Sorkar Pdeng ba la ïoh mynta ban plie ïa ki artylli ki surok ba jrong kumba 546 mitre ha ka jinglut baroh kaba la kot T. 6, 33, 69, 000 klur kiba dei ruh hapoh ka jaka jong ki shipai.
Kine ki artylli ki surok ïaid kali kidei kiba pynïasoh ïa ka main entrance gate jong ka Arts and Culture, Rilbong lyngba ka Rilbong Community Hall shaduh jingkieng Umshyrpi bad ka surok ba la don lypa, bad kawei pat kadei ka Motorable link road na ka surok PWD ba la don lypa lyngba ka Rilbong Community Hall shaduh jingkieng Umshyrpi.
U Bah Sanbor Shullai haba kren ha ka jingïalang u la ainguh ïa u Blei nongbuh Nongthaw ba u la ai kane ka Sngi ba bha ban ïoh plie noh ïa kine ki surok ba la angud lah slem bha.
U la ong ba kane kadei ka jingangnud kaba la slem bha, naba la buh maw nongrim ha u snem 2021 da u Myntri ka Tnat PWD (Roads) u Bah Prestone Tynsong bad hadien katto katne por ki la mih ruh ki jingmut ba kan dei tang ka jingbuh maw nongrim kaba snaïap bad la don ruh kiba shim kabu saiñ pyrthei halor kane ka jingbuh maw nongrim.
U la ïathuh ba naduh ba la buh maw nongrim ka la hap ban shim por haduh 1 snem 8 bnai ban pyndep ïa baroh ki jingdonkam haba ïadei bad ki kot ki sla bad jingïoh jingbit hynrei naba ka hab hapoh cantonment board hap ïaid bun ki lynti kiba jyrwit jyrwat.
U la ïathuh ruh ba kan hap shim por da ki bnai ban leit shaduh Delhi ban kynduh ïa u Rajnath Singh Myntri ka Tnat ki Kam Pohïing ka Sorkar Pdeng ban pynshai halor kane ka surok ha kaba u la ong ba ka BJP kadei na ka bynta ka bha ka miat ki nongshong shnong bad hadien kane la ïoh jingbit na ka cantonment board.
U la ai khublei ïa ki ophisar PWD, ïa ki trai jaka kiba la ai ei khlem donkam siew, nangta ïa ka cantonment board bad kiwei kiwei kiba la kner bun ki lad jingïarap.
“Ka thong jong nga ka long ba ha kine ki 8 snem nga la shim ka polisi kaba thymmai kata ka long kren khyndiat trei shibun bad dei da ka jingieid bad ïatreilang jong baroh khamtam kito kiba kyrshan ïa nga kan ïaibteng kumne manla ka por, naba ka kyntien ka ong haba shakri ïa ki paidbah kadei ka jingshakri ïa U Blei,” ong u Bah Sanbor.
Katba u Executive Engineer PWD Roads u Bah S Lytep u la ong ba kane kan long ka khana kaba pynsah kynmaw ïa ka PWD bad kumjuh ruh ïa ki nongshong shnong ba ki jingphoh sniew ki la urlong khamtam eh na ka dheng kali kaba jur bha ka Rhino bad Anjali Pump.
Haba ïathuh ïa baroh ka jingmang pisa na ka bynta baroh 2 tylli ki Link Road u EE u la ong ba lyngba ka jingtrei shitom u MLA Bah Sanbor Shullai ïa kine ki surok la lah ban plie ha ka sngi Saitjaiñ.
U la ong ba ha kato ka por la ïoh mang pisa lyngba u MLA, u PWD minister hynrei la shem jingeh ban sdang ïa ka kam, namar kane ka jaka ka hap hapoh ka cantonment da ka jingïarap u MLA la ïoh ka jingai jingbit bad la ïoh ban sdang ka kam, hynrei wat hadien ba la sdang ruh wan sa ka aïom slap sa hap pynslem ïa ka kam.
“Da ka jingïatreilang jong baroh ngi la don mynta hangne ban plie ïa kane ka surok da ka jingkmen bad na ka PWD kan long ka sngi sah kynmaw ba la urlong kane ka jingangnud jong baroh.
Ïa ka jingïalang la pynïaid da u Rangbah Shnong u Bah Glanding Lyngdoh uba ha ka kyrteng ki nongshong shnong ka Rilbong Kenches Trace u la ai khublei ïa u MLA bad baroh kiba ïatreilang ba kane ka jingangud ba lah slem bha ka la urlong bad na ka liang jong u, ula ong ba khlem u Bah Sanbor kane ka jingphoh sniew kan ym urlong shisha, baroh ki surok ha Lumparing baroh ki surok kiba thiep bha ruh ki la urlong lut.
Ha ka prokram la donlang ka seng kynthei Kenches, ka BJP mahila 19 South Shillong, ki 8 tylli ki dorbar shnong, nangta u Lavesh Panday u SP City East Khasi Hills, u Bah P Pakyntein, JE, u Bah P Hujon JE, Bah R Nongrum JE, nangta u D Marak DSP incharge traffic, u Bah Hamasaia Sen Secretary ka dorbar shnong bad kiwei kiwei kiba la shah khot sngewbha.