Kan pynthikna ba ka mang tyngka ba la mynjur da ka ïingdorbar kin trei hok bad poi sha ki paidbah: Mayralborn

Shillong, Ïaiong 10: Ka Estimates Committee jong ka Ïingdorbar Thaw Aiñ ka Jylla Meghalaya ka la pynkut ïa ka jingïalang bishar bniah kaba ar sngi bad ki hynriew tylli ki tnad trei kam ka sorkar – ka Education, Public Works Department (PWD), Public Health Engineering (PHE), Social Welfare, Home (Police), and Information Technology & Communication ha ka sngi Thohdieng.
Ha kane ka jingïalang la wan ïashim bynta da u Chairman ka Committee u Bah Mayralborn Syiem, ryngkat ki dkhot u Bah Ronnie V. Lyngdoh bad u Bah Shakliar Warjri.
Haba kren sha ki lad pathai khubor hadien ka jingïalang, u Chairman u Bah Mayralborn Syiem u la pynpaw ba, kumba la bthah da ka Ïingdorbar Thawaiñ ka Jylla Meghalaya, ïa ka kaiphod ba bniah bad ki jingai jingmut jong ka Committee yn sa buh ha ka miej jong ka Ïingdorbar.
Ha kaba ïadei bad tnad pule puthi.
Ka Committee ka la ïakren ba bniah halor ka jingpyntreikam bad ka jingïaid shaphrang jong ki projek jingtei, kynthup ïa ki kam shna ïa ki jingtei ha ki Model Degree College ha Rongjeng bad Patharkhmah, Kiang Nongbah College, bad ha ki Polytechnic bapher bapher ha kylleng ka jylla.
Ha kaba iadei bad ka tnad Public Works Department (PWD):
Ka Committee ka la bishar bniah ïa ki projek kiba dang ïaid bad kiba la thmu hapoh ka PWD (Buildings), ba kynthup ïa ki kam pynbha ïa ka Meghalaya House bad kiwei kiwei ki jingtei hapoh ka jylla bad shabar ka jylla.
Halor ka tnad Public Health Engineering (PHE):
La bishar bniah ïa ka jingiaid shaphrang jong ka Greater Ampati Water Supply Scheme kaba heh bad ki bynta kiba ïadei bad ka.Ka Committee ka la bthah ïa ka tnad ban pynsted ïa ka jingpyndep ïa kane ka projek kloi katba lah.
Ha kaba ïadei bad ka Social Welfare:
Ka Committee ka la pynpaw ka jingsngewkhia halor kumba 1,600 tylli ki shnong kiba duna ka jingdon ki Anganwadi Centre.La bthah ïa ka tnad ban wad ki lad ki lynti ban ïa ki Centre, kynthup ban pan jingkyrshan na ka sorkar pdeng, wat hapdeng ki jingeh kiba ïadei bad ki kyndon ba la don lypa jong ka jingbun briew bad ki iing ki sem.
Ha kaba ïadei bad ka tnad Home (Police):
Ki jingiakren ki long halor k kam pynroi ha kaba ïadei bad ki jingtei hapoh jong ka tnad.Ka Committee ka la pynpaw ban pyndep ha ka por kaba biang ïa ki projek katkum ki kyndon mang tyngka jong u snem mang tyngka ba la dep.
Ha kaba ïadei bad ka Information Technology & Communication:
Ka Committee ka la ïaroh ïa ka jingpyndep jong ka IT Park ha Umsawli bad pynpaw ka jingkyrmen ba kan ïarap ban weng ia ka jingkyrduh kam.La bishar bniah ruh ïa ka jingpyniasoh na ka bynta ka internet kaba stet, ha kaba la ïathuh ba katei ka jingthmu ka dang don ha ka kyrdan kaba khatduh.Ki katto katne ki jaka, kynthup ïa ki bynta jong ka Tura, la khmih lynti ba kin sa treikam noh shen.
U Chairman ka Committee u Bah Syiem u la pynpaw ba ka jingpynheh ïa ka jingpynïasoh internet kaba stet la khmih lynti ba kan pynkylla shibun ïa ka lawei jong ka jylla.
Shuh shuh u Bah Mayralborn u la pynshai ba ka kamram jong ka Estimates Committee kam dei ban kynnoh, hynrei ban pynthikna ba ki kyndon mang tyngka ba la mynjur da ka iing dorbar kin pyntreikam hok bad ba ki jingmyntoi kiba la thmu kin poi sha ki paidbah.