Shillong, Naitung, 14 : Ki paidbah nongshong shnong jong ka shnong Mawpud kaba hap hapoh ka Ranikor C&RD Block jong ka South West Khasi Hills haduh mynta ki la im khlem ka umbam umdih haduh mynta na ka daw ka jingdkhut jong ki pipe um na ka jingtwa khyndew.
U Myntri Shnong jong ka shnong Mawpud u Bah MacDonald Thongni u la ïathuh ba ka shnong kam shym la ïoh shuh ïa ka umbam umdih na ka daw ka jingtwa khyndew kaba la jia ha ka 16 tarik Jylliew, 2022 ha Lad Domalein kaba jngai kumba 5 kilomitar napoh shnong
U Bah Thongni u la ïathuh ba ka jingpynpoi ïa ka umdih ha ka shnong Mawpud ka la shah ktah namarba ka tyllong um ka don ha Photsohbar bad baroh ki pipe um kiba la thep ha tyllong um kiba pynïasoh bad ki pipe um ba la pynpoi ïa ka umdih shapoh shnong ki la shah pynjulor na ka jingtwa khyndew ha ka 16 tarik, Jylliew.
“Ïa mynta, ki paidbah ki hap ban leit tong um na ki tyllong um kiba don hajan ka shnong bad mynta ka shnong ka don hapdeng ka jingtyrkhong um kaba shyrkhei bha,” la ïathuh u Bah Thongni.
Halor kane, u Bah Thongni u la kyntu ïa ka tnat PHE ba kan shimkhia noh kham kloi katba lah ban maramot ïa ki pipe um ha ka tyllong um ha Photsohbar.
Shuh shuh u Bah Thongni u la kyrpad ïa u MLA u Bah Pius Marweiñ ban shimkhia lem halor kane ka kam ban ïakren bad u Myntri ka tnat PHE ka Sorkar Jylla khnang ban weng noh kham kloi ïa ka jingtyrkhong um ha kane ka shnong.
