Dawa ka MEMRIWU ban sangeh khot tender ïa ki kompani bad thung kam pura ïa ki nongtrei 108

Shillong Iaiong 8 : Ka Meghalaya EMRI Workers Union (MEMRIWU) ka la kyntu ïa ka Sorkar Jylla ban thungkam pura noh ïa ki Nongtrei 108 Emergency Service bad ban pynsangeh ïa ka jingthmu ban khot tender biang ban aiti ban pynïaid ha ki kompani shimet da kaba pynpaw ba ka rukom ai jingshakri kam shym la long kaba bha ha ki snem kiba la leit, hapoh ka jingpynïaid ki kompani shimet hynrei ka rukom pynïaid ka la long pat kaba ryntih hapoh ka jingkhmih jong ka National Health Mission (NHM).
Ha ka dorkhas kaba la aiti sha u Myntri ka Koit ka Khiah u Bah Wailadmiki Shylla, ka Union ka la ong, ba ka jingai jingshakri ka la ïaid mynta la 16 snem naduh u snem 2008 bad la shim ba ka long ka jingai jingshakri kaba kongsan tam ha ka ban shimkhia ïa ki jingjia kiba kyrkieh bad ki jingdonkam ki nongshong shnong.
Ka Union ka la pynpaw ïa ka jingpyrshah kaba jur halor ka jingkhot tender biang ban ai jingshakri bad ka pynpaw, “Hadien ka jingtrei kam kaba sniew jongka GVK Company kaba la ïoh tender ban pynïaid ïa kane ka jingshakri, ka la pynlong ïa ki nongtrei bad ki nongshong shnong ban pynlong ïa ki jingïakhih ha ki snem kiba la dep bad ka la ktah jur ïa ki jingai jingshakri kyrkieh ïa ki paidbah ha ka por ba ki mad ïa ki jingjia aksiden”.
Haba pynpaw ïa ki jingeh hapoh ka jingpynïaid jongka GVK, ka Union ka la pynpaw “Ngi lah sakhi ïa ki jingleh kiba sniew ha ka por jong ka GVK, naduh ka jingsumar ka jingbym don ïa ka jaka ban shna ne maramot, ka jingbym lah ban maramot ïa ki kali kit nongpang ne Ambulance ha ka por, ka jingduna jong ka jingdon ki nongtrei, ka jingduna ha ka ban pynbiang ïa ki tiar sumar, ka jingbym buh lypa ïa ki tiar kiba donkam bad kiwei kiwei”.
Ki nongtrei ki la pynpaw pat ba naduh ba la pynïaid da ka NHM, ka rukom pynïaid ka la long kaba ïaid ryntih khlem kino kino ki jingeh.
Ka Union ka la pynsngew ba namar ba ka jingai jingshakri ka long kaba kongsan kaba bei tyngka da ka sorkar, “Kumta ka long kaba ïahap bha ba ka sorkar kan shim ban pynïaid hi noh dalade” bad ka bynrap ba ka jingkhot tender ïa ki kompani kan lam tang sha ka jingbamsap bad ka jingaiti ban pynkylla sha ka kynhun shimet.
“Da kaba shim noh ïa ka jingpynïaid na ka sorkar, ki paidbah kin don ha ka jingeh namar ba ka kompani kan longtrai noh ïa ka jingai jingshakri ym shuh da ki paidbah ne ka sorkar” la pynpaw ha ka dorkhas.
Ki nongtrei kila kyntu ïa ka sorkar ba ka dei ban pynkut noh ïa ka jingkhot tender ïa kane ka jingai jingshakri kaba kongsan bad ban shim ïa ka jingtyrwa ban ithuh pura noh ïa kane ka jingai jingshakri jong ki nongtrei na ka bynta ka miat bad ka jingmyntoi jong ki briew hapoh ka jylla.
Ka Union kala pynpaw ruh ïa ka jingpyrshah kaba jur ïa ka sorkar kaba la rai ban aiti lyngba ka Sub-Tender sha ka “Shishupal Agency” ban thungkam ha ka 108 Emergency Response Services bad ka la dawa ba dei ban thungkam beit beit da ka sorkar hi.
“(Ngi) pynpaw ïa ka jingpyrshah kaba jur halor ka jingïoh jingtip ïa ka jingthmu ban aiti ïa ka Sub-Tender sha ka ‘Shishupal Agency’ ban pynrungkam ïa ki nongtrei ha ki kyrdan ki bapher bapher hapoh jongka 108 Emergency Response Services.”
Ka Union ka ïeng skhem halor ka jingïai dawa ba dei ban thungkam beit da ka sorkar ne NHM.
“Ngi ngeit skhem ba ka jingpyndonbynta ïa kawei pat ka kynhun ha ka jingai jingshakri kaba kongsan kan lam sha ka jingmih ka bym hok ha ka rukom trei rukom ktah bad ka jingduna jong ka jingkhuid jingsuba”.
Ka Union ka la tyrwa “Ba ka Sorkar ne ka National Health Mission (NHM) ka dei ban pynlong ïa ka jingthungkam da kaba ai jingpynbna ïa ki paidbah, ka jylla ka lah ban pynthikna ba man la ki nongshong shnong kiba la bit la biang ha ka kyrdan kin ïoh lang ïa ka lad ban ai jingshakri ha ki kam kiba long kongsan tam”.