Elekshon MP : Nga kloi ban ïakhun lada ka seng ka jied ong u Bah Sanbor

0

Shillong, Ïaiong 08 : U MLA ka BJP na Shillong South ba dei ruh u Myntri ha ka Sorkar Jylla Bah Sanbor Shullai ha ka sngi Balang u la pynpaw ba u long uba kloi ban aireng ha ka elekshon MP shiteng samoi lada jïa ba ka BJP ka imon bad jied ïa u kum u kyrtong jong ka party.
Ïa kane u Bah Sanbor u la pynpaw haba kren bad ki lad pathai khubor da kaba pyntip ruh ba na liang ki bor bahalor jong ka party BJP ki la ai ka jingmynjur ban sei kyrtong na bynta kane ka elekshon shiteng samoi sha Lok Sabha hadien ka jingkhlad kyndit noh u MP ka Shillong u Dr. Ricky AJ Syngkon ha u Rymphang mynta u snem.
“Kum u nongtrei ba kohnguh sneng jong ka party, lada jia ba ka party ka jied bad ka imon ïanga, nga long uba kloi ban mih shakhmat ban aireng,” ong u Bah Sanbor halor ka jingkylli la u long neem uba kloi ban ïakhun biang mynta ka kynti ruh ïa katei ka elekshon.
Haba pynkynmaw ïa ka jingmih jong u ban ïakhun ïa ka elekshon MP ha u 2019, u Bah Sanbor u la ong ba ha katei ka elekshon u ïoh por tang lai taiew bad kane ka la buh ha ka khim khait ban pynkhreh khamtam haba ki hap ban leit haduh 36 tylli ki constituency jong ka Shillong seat.
Hynrei u ong pat ba kum u nongtrei ba shitrhem ka party um ju kyntait hynrei u pdiang beit da ka mon sngewbha.
Shwa kane, u Bah Sanbor u la ïathuh ka Party na Delhi ka la ai ka jingmynjur ba ki hap ban sei kyrtong kaba mut ba ka BJP kan aireng ha kane ka elekshon MP Shiteng samoi.
Da kaba pyntip ba haduh mynta ka jingkhot ïa ki kyrtong kam pat sdang hynrei u la ong pat ba ha ka sngi ba ki rakhe ïa ka sngi seng jong ka party, ki nongïalam na Delhi ki la ai jingmynjur bad mynta kaba sah ka long sa ha u State President ka party ban pynïaid shakhmat ïa ka kam.

Leave A Reply

Your email address will not be published.