Hukum ka ïingbishar HC ban pynkhlaiñ pahara ki Pulit ha ki jaka ba jur ka jingkhaïi drok
Shillong, Iaiong 8 : Ka ïing Bishar High Court jongka jylla ka la hukum ïa ki bor pulit ba kin pynkhlaiñ ka jingpahara ha ki jaka ba jur ka jingkhaïi drok bad kumjuh ruh ban bteng ka jingpyntreikam ïa u Drug Helpline.
Ka Division Bench jongka ïing Bishar kaba kynthup ïa ka Chief Justice Revati Mohite Dere, Justice W Diengdoh ki la pynmih ïa kane ka hukum hadien ba shong bishar ïa ka mukotduma PIL.
Ka ïing Bishar ka la btah ruh ïa ka tnad Customs, Border Security Force (BSF) bad National Narcotic Control Bureau (NCB) ba kin ai ïa ka affidavit kaei kaba ki la leh halor ki kam khaïi drok bad katno tylli ki case la rejister naduh u 1 tarik Kyllalyngkot 2025 tad haduh mynta.
“ Ngi kwah ban pynshai ba lada ïa u Helpline Number uba la pyntreikam la pynsangeh noh, dei ban bteng biang ban pyntreikam noh shwa ban shong bishar biang ïa kane ka mukotduma” ong ka hukum jongka ïing bishar.
Ha kaba ïadei pat ba ka jingpahara, la hukum ïa ki bor Pulit ba kin pynkhaiñ ka jingpahara ha kito ki jaka kiba jur ki kam khaïi drok ne kiba la suba ba ki nongdie ki ju pyndonkam” kata kum hajan Ajmera Marble, Punbabi Lane, haduh Mandir, Iew Polo, Botanical Garden hajan Nanpolok. Oakland Road, Stand Jeep, jaka pynieng kali ha Garikhana, madan jongka Gorkha Patshala School, Iew Jhalupara,hajan Mandir, Hopkinson Road hadien ka skul St Anthonys, Shillong College shaduh BK Bajoria, Demseiniong sha Nongmynsong, Happy Valley, Madanriting, kiba bun ki Dong ha Mawlai, Laban Cantonment, Ramkrishna Mission Vivekananda Cultural Centre ,Quinton Road, Paltan Bazar, Umsohsun, Barapathar Cantonment, Mawbah, Upper bad Lower Mawprem, Rilbong Zigzag Road, Jail Road hajan Puja Mandap, khlaw Malki, NEIGRIHMS Shaduh New Shillong, Lanchand, Golflin, halyndet ka Bansara Eye Clinic, Lady Veronica Land, Butcher Road ha lyndet Shani Mandir.
Ka ïing Bishar ka la bthah ruh ia ki bor ka Custom, BSF bad NCB ba kin thaw ki lad ki lynti kumno ban ïakhun pyrshah ïa u Drok. Labuh ban shong bishar biang halor kane ka mukotduma ha ka 7 tarik Jymmang.