Ngi sngewkhia ïa ki kynrum kynram hapdeng ka MCTO&DA bad SWKHTO&DA : HITO SWKHD

Mawkyrwat, Ïaïong 08 : Ka Hynñiewtrep Integrated Territorial Organisation (HITO) jong ka South West Khasi Hills District, da ka jingsngewkhia ka la mih shakhmat ban pynpaw ïa ka jingud jingnam jong ki nongñiah kali bad ki nongbylla, khnang ban ïada ïa ka jingshngaiñ bad ka jingïaid beit ïaid ryntih jong ki ha ka kam.
Ka seng, lyngba u bah Paul Thyrniang, President ka HITO South West Khasi Hills District ka la phah ruh ïa ka kyrwoh sha baroh ar tylli ki kynhun, kata ka Meghalaya Commercial Transport Owners & Drivers Association (MCTODA) bad ka South West Khasi Hills Truck Owners & Drivers Association (SWKHTODA), halor ka jingïa-ka-jia bad ka jingbym ïasngewthuh jingmut kaba la mih ha kaba ïa dei bad ki kali kit Cook.
Na ka liang ka seng, la pynpaw ba kam don kano kano ka jingshah shiliang ne jingïashah liang hapdeng kine ki ar kynhun, hynrei ka seng ka ïeng beit tang na ka bynta ka jingïada ïa ka jingshngaiñ jong ki nongñiah truck, ki nongbylla, bad khamtam ïa ki trai kali kiba dei ki trai ri trai muluk.
Shuh shuh, ka seng ka ai jingmut ba lada ki paidbah kim ïatylli bad kim lah ban ïapynbeit ïa kine ki jingïa-ka-jia, kan wanrah ka jingkhang lad ïa ki trai ri trai muluk ban kiew shaphrang. Ka seng ka maham ruh ba lada ym lah ban pynbeit noh kloi, kan don ka jingma ba ki nongwei kin ïoh lad ban rung bad knieh ïa ka kamai jakpoh jong ki paidbah trai shnong.
Kumta, ka HITO ka phah ka jingkyrpad sha baroh ar kynhun ba kin shimkhia ban ïapynbeit noh mardor ïa kane ka jingïakajia, khnang ban wanrah ïa ka shongsuk shongsaiñ, ka jingïatylli, bad ka jingïoh jingmyntoi lang ïa baroh kiba im da kane ka kam. Kane ka long ka kyrwoh da u bah Paul Thyrniang, President ka HITO South West Khasi Hills District.