Shillong, Ïaiong 08 : U MLA ka BJP na Shillong South ba dei ruh u Myntri ha ka sorkar, Bah Sanbor Shullai ha ka sngi Balang u la ong ba ka BJP kan dang ïoh biang ban ïalam ïa ka bor synshar ha Assam hapoh ka jingïalam jong u Himanta Biswa Sarma.
“Ka BJP kan dang bat biang ïa ka bor synshar ha Assam bad u Myntri Rangbah Himanta Biswa Sarma un dang bteng kum u Myntri Rangbah ka Assam,” ong u Bah Sanbor haba kren halor ka elekshon MLA kaban sa long shen ha Assam.
Shuh shuh u Bah Sanbor u la ong ruh ba katkum ka jingtip bad ka jingïohi ïa ka jingtuid ki paidbah ha ki jingïalang bapher bapher, ka pyni ïa ka jingshngain ba ka BJP kan dang jop biang ha kane ka elekshon mynta ka kynti ruh.
“Phi ïohi ba man ki jingïalang ïalap elekshon ha Assam ki paidbah ki tuid kaba pyni ba ki dang don ka jingshaniah bad ka jingkyrshan ïa ka BJP,” u la bynrap shuh shuh.
