Long kiba la pynkhreh ba la poi ka lyiur bthah ka DC ïa baroh ki tnad sorkar ha EKH

Shillong, Iaiong 8: Ki bor Synshar District ka East Khasi Hills ki la bthah ïa baroh ki tnad sorkar ba kin long kiba la pynkhreh shuwa ban wan ka aiom slap ne Lyiur kum ka kam ba hakhmat eh ban pynthikna ïa ka jingïatreilang lada jia ba wan kano kano ka jinglynshop ki bor ka mariang ha kane ka lyiur 2026.
Ia kane ka jingbthah la pynpaw ha ka jingïalang ka District Coordination jong ka Incident Response Team (IRT) kaba la long ha Conference Hall jong ka Deputy Commissioner, East Khasi Hills District ha ka sngi Balang.
ïa kane ka jingïalang la pynïaid da ka Deputy Commissioner bad Chairperson (DDMA) Kong RM Kurbah bad la wan ban ïashim bynta da u Additional Deputy Commissioner bad CEO (DDMA) u Bah S Warjri ryngkat bad ki ophisar na ki tnad bapher bapher, ki Block Development Officer, Sub Divisional Officer (C) bad ki nongmihkhmat na ka Armed bad Paramilitary Forces.
La lum ïa ka jingïalang da ka jingthmu ban khmih ïa ka jingpynkhreh lypa jong ki tnad bapher hashwa ka jingwan ka aiom lyiur.
Ha kane ka jingïalang, la shim ïa ka rai ba baroh ki tnad ki dei ban leh ïa ki kam ki ban long kum ka jingpynkhreh lypa, kiba kynthup ia ka jingjurip ïa ki jaka kiba ju don ka jingshlei um, ban khmih ïa ki dieng kiba la tlot bad ki sainar elektrik kiba lah ban khyllem ne buh ha ka jingma lada jur ka lyer ne eriong bad ther u lapbah lapsan.
Ka Deputy Commissioner kala banjur ïa ka jingdonkam ban pynlong man la ka por ïa ki ‘Mock Exercise’ ha kylleng ki ophis sorkar ban pynkhlaiñ ïa ki jingai jingshakri jong ki tnad haba mih ki jingjia kiba kyrkieh, ban leh ïa ka Fire Safety Audit ïa ki jingtei ne building kaba long ka bynta kaba kongsan ha ka jingpynkhreh bad la bthah ïa baroh ki tnad ba kin khmih bad ban lum jingtip ïa baroh ki jingdon jingem kiba ki dang don khnang ba ka jingai jingshakri bad jingïarap kyrkieh kan long kaba ïaid ryntih.
Ka Chairperson kala kyntu ïa baroh ki ophisar sorkar ba kin long kiba peitngor bad ban pynthikna ba ki dei ban leh kloi bad shimkhia mardor haba don kino kino ki jingjia lynshop ki bor mariang.
Ka jingïalang kala kut da ka jingïengskhem jong ki bor pynïaid district ban ïada ïa ka jingim jong ki briew bad ïa ki jingdon jingem lyngba ka jingpynwandur bha ïa ka rukom treikam bad ka jingdon ïa ka jingïatreilang bad ki tnad bapher bapher.
Lada don kano kano ka jingjia jong ka jingwan lynshop ki bor mariang, ki paidbah ki lah ban pyntip da kaba phone ha u nombar 112 na ka bynta ban ïoh mardor ïa ka jingiarap ne jingkyrshan.