Shillong, Ïaiong 7: U Myntri Rangbah ka Jylla Conrad K Sangma ha ka sngi Ba-ar u la ai khublei ïa ki samla pule kiba la pass ïa ki eksamin SSLC, da kaba ai ka jingïaroh ïa ki Topper halor ka jinglah jong ki.
Ha ka jingthoh ha X, u Sangma u la ong, “Khublei ïa baroh ki khynnah skul baieit jong ngi kiba la pass ïa ki eksamin #SSLC jong ki. Kudos ïa ki toppers kiba la pynlong ïa ki kmie ki kpa, ki nonghikai bad ki skul jong ki ban sngew sarong!Ngi kitbok kitrwiang ïa phi iwei pa iwei ïa ka lawei ba phyrnai.To phin ïai long kiba tyngshain beit!”
Mynta u snem, ki don 48,623 ngut ki samla pule na ki 719 tylli ki jaka pule ha kylleng ki 171 tylli ki centre kiba la wan ban ialeh ïa ka eksamin SSLC, ha kaba 42,228 ngut ki samla pule ki la long kum ki nongjop.
