Ai jingïaroh u Myntri ïa ki khynnah skul bad nonghikai halor ka jingpas bha ha ka SSLC
“Dei u soh jong ka jingshimkhia ka sorkar ïa ka pule puthi”
Shillong, Iaiong 7: U Myntri ka tnad Pule Puthi u Bah Lahkmen Rymbui u la ïaroh ïa ki khynnah skul, ki nonghikai, bad ki kmie ki kpa hadien ba ka jylla Meghalaya ka la kynjoh ïa ka jingpass kaba 86.84% ha ka eksamin SSLC 2026.
Haba thoh ha X, u Bah Rymbui u la ong: “Khublei ïa baroh ki samla pule ba pynïoh 86.84% pass ha ka SSLC exam 2026. Khublei ïa ka jingïai pyrshang jong phi, ka jingaiti jong ki Nonghikai & ka jingkyrshan jong ki Kmie ki Kpa. Ka jingnang pass bha ha kylleng ka Jylla ka pyni ïa ka jingnang kiew shaphrang ka pule puthi. Ka jingkitbok kitrwiang na ka bynta ka lawei jongki”.
Ka Meghalaya Board of School Education (MBOSE) ka la pynbna ïa ka result jong ka SSLC ha ka sngi Ba-ar.
Na ki 48,623 ngut ki samla kiba la ïaleh ïa ka eksam, haduh 42,228 ngut kiba la pass ïa kane ka eksamin.
U la ainam ïa ka jinglehbha jong ki khynnah skul ha ka eksamin Secondary School Leaving Certificate (SSLC) mynta u snem sha ka jingpyrshang jong ka Sorkar ban shimkhia hakhmat eh ïa ka pule puthi.
“Ka result hi ka kren dalade, da tang 6000 ngut kiba khlem pass na ka jingdon baroh kiba ïakhun ïa ka eksam” ula ong mynta ka sngi Ba-ar.
U Bah Rymbui ula kyntu ïa ki khynnah skul ba khlem pass ba kin shim kabu ïa ka eksam SSLC Supplementary ban wan, ka ban long ha u bnai Jymmang.
“Ka don beit ka lad kaba ar Nga kyrmen ba kito kiba khlem pass ba kin shim ïa kane ka lad” ula ong.
Ula pynpaw ïa ka jingdon bun jait ki skul bad ki khynnah kiba pass bha, kynthup kito kiba wan na ki jaka nongkyndong.
“Kane hi ka kren halor ka jingpyrshang jong ki skul bad ka Sorkar ban pynbha ïa ka pule dangle” ong u Bah Rymbui haba ainam ïa ki sienjam bala shim da ka Sorkar, kynthup ka jingwanrah ïa ki help book.
U Bah Rymbui ula ong “Naduh u snem 2018, ngi la shimkhia hakhmat eh ïa ka kam pule puthi, pynbeit ïa ki jingeh bad pynkylla ïa ka rukom treikam na ka bynta ka bit ka biang ki khynnah skul” ula ong haba bynrap “Ngin ïai bteng ban pynbeit ïaki jingduna, bad pynthikna ba ki khynnah skul jong ngi, kin ïoh ïa kaba bha tam”.