Haduh 70 lak kawei ka skul Govt. L.P mang ka sorkar ban maramot ïa ki 180 tylli : Bah Powell

Shillong, Ïaiong 7: U MDC ka Mawthadraishan uba dei ruh u Executive Member (EM) jong ka Executive Committee ka ba ïalam da ka Voice of the People Party (VPP) ha Khasi Hills Autonomous District Council (KHADC) ba peit ïa ka tnad Development, u Bah Powell Sohkhlet u la pyntip ba ka sorkar jylla lyngba ka tnad pule puthi kala mang haduh 126 klur tam ban maramot ïa ki skul sorkar ha ka kyrdan Lower Primary School.
Haba ïa kren bad ki lad pathai khubor, u Bah Powell Sohkhlet u la pynpaw ka jingbynniaw halor ka jingleh shilliang khmat ka sorkar jylla haba ïadei bad ka jingmang pisa ban maramot ïa ki skul sorkar jong ka Lower Primary School ha ki district bapher bapher ka jylla.
Shuh shuh u Bah Powell u la pyntip ba ka “sorkar jylla lyngba ka Directorate of School Education & Literacy (DSEL) ka la khot tender ban shna ban maramot ia 180 tylli ki Govt LP skul ha kane ka jylla tang da kawei ka company”.
Ula ong ba katkum ka Tender na ki 180 tylli ki skul, 178 tylli ki dei ki Govt LP School bad kawei kadei ka Secondary School bad kawei kadei ka Higher Secondary School.
” Kawei kawei ka skul LP la mang haduh 70.18 lak ban maramot ban shna pynbha ïa ki ïing skul.Katba na bynta ka Secondary bad Higher Secondary la mang 78.96 lak” ong u Bah Powell.
Halor ka jingbym ioh ryntih ki skul na kawei ka district sha kawei pat, u Bah Powell u la ong, “Na ki 180 tylli ki skul, ka Eastern West ka ioh tang 8 tylli ki skul kiba ioh ïa ka Fund.Katba ka West Garo ka ioh haduh 38 tylli, ka West Jaintia ka ioh haduh 29 tylli bad ka East khasi kaba dei ka district kaba kham heh ka ioh 19 tylli”.
Shuh shuh u Bah Powell u la ong, “Ngi sngewtynnad ba ki hep kiba rit kin ioh ïa ki karma klas kiba bit kiba biang hadien ba la dep ban shna pynbha ïa ki, hynrei ka rukom leh jong ka sorkar ka long kumba leh shilliang namar ba kim ïa ryngkat kum kiwei ki district”.
Ha kawei ka liang pat u Bah Powell u la ong, Ki don ki skul kiba la seng da ki Balang bad ki shnong ki hap ha ka Deficit bad ki shu ioh ka jingïarap tang ha kaba iadei bad ka tulop na ka sorkar katba ka jinglut jingsep ha kaba ïadei bad ki kam maramot ki hap ban lut hi.
Shuh shuh u Bah Powell u la ong, haba ka sorkar ka don pisa haduh katne katne klut kala dei ban pyrkhat lang ïa ki skul Deficit bad Adhoc na ka bynta ban ïarap ïa ruh ha kaba ïadei bad ka jingmaramot.
Haba ïathuh katkum ka jingioh ki Constituency u Bah Powell u la ong ba ka Mawthadraishan ka iong tang lai tylli ki skul katba ka Mairang ka ioh 5 tylli ki skul.
Halor kane ka jingiarap na ka sorkar ba la mang sha ki 180 tylli ki Govt LP skul, u la kyntu ïa ki bor ba dei peit kum ki managing committee ba kin da peit bniah bha ha kaba ïadei bad ka jingmaramot ba kan long katkum ba la mang da ka sorkar ban pyntrei hok ïa ka.