Shillong, Iaiong 7 : U Myntri ka tnad Pule Puthi u Bah Lahkmen Rymbui ula bthah ïa u Executive Member ka KHADC bad MDC ka Mawthadraishan u Bah Powell Sohkhlet ba un mang pisa na ka skhim MDC lajong ban shna pynbha bad maramot ïa ki iingskul, haba kyntait ïa ki jingkynnoh ba leh shiliang ha ka jingsam ïa ka song pisa maramot ïingskul.
“Ngam thikna mano ba pynmih ïa kane ka jingkynnoh bad ha kano ka nongrim, kumta ngam lah ban jubab ïa ka. Hynrei, naduh u 2018, ngi la buh hakhmat eh ban maramot bad shna pynbha ïa ki ïingskul, kum shibynta na ka mission jong ngi ban ai ïa ka pule puthi kaba bha tam sha ki khynnah skul. Mynta u snem, ngi la mang ban maramot haduh 186 tylli ki skul, kynthup kiba la wanrah ïa ka arts stream ha ki Higher Secondary School” ong u Bah Lahkmen haba ïakren bad ki nongthoh khubor ha ka sngi Ba-ar, haba jubab ïa ki jingkynnoh u bah Powell.
U Bah Rymbui ula ai jingmut ba u EM ka KHADC Bah Powell Sohkhlet u dei ban pyndonkam ïa la ka skhim MDC na ka bynta ban maramot ïa ki ïingskul haba ong “Kum u MDC, u ruh u don la ka jong ka skhim ban maramot ïingskul. Kumta, u dei ban mang kham bun ka pisa na la ka jong ka skhim”.
U Myntri ula ïathuh ïa ka jingpyrshang jong ka Sorkar da kaba ong, “Ngi la mang 186 tylli ki skul hapoh ka Mission-IV, bad kane kan dang bteng. Ngi la pyrshang kat kaba lah bad ki kam kila nang ïaid”.
U Myntri ula ban jur ïa ka jingdonkam ban ïatreilang da kaba ong “Nga kyntu ïa baroh ki kynhun ba don bynta, ban ïasnohkti lang bad ka Sorkar. Ha ka jaka ban shu kynnoh, to ngin ai jingïaroh ruh ïa ki lynti ba la shim da ka Sorkar bad ban ïatreilang na ka bynta ka jingmyntoi ki khynnah skul”.
Ula ai nam ïa ka jinglong nongïalam u Myntri Rangbah ka Jylla Conrad K Sangma bad ong “Lada ym dei na u Myntri Rangbah, ngin ym kynnoh ïa kane. Ula buh ïa ka pule puthi hakhmat eh bad ngi la ïohi ïa u soh”.
U Bah Lahkmen ula kyntu ïa ka jingïatylli bad ong “To ngin kiar na ka jingïakdew kti bad ïatreilang na ka bynta ka kam pule puthi ha ka Jylla. Ka jingmyntoi ka long na ka bynta ki khynnah skul, ym ki riew shimet”.
