Shillong, Ïaiong 06 : U Myntri barim ka sorkar jylla ba dei ruh u MLA jong ka BJP na Pynthorumkhrah, Bah AL Hek u la shah pynkup burom da ka khusnam AIMS Democratic Leadership Award 2026 ha ka jingïalang kaba long ha Constitutional Club ha nongbah New Delhi dang shen.
Katkum ka kyrwoh, la ïathuh ba kane ka khusnam ba ka Alliance of Intellectual Minds & Statesmen (AIMS) ka ai ka dei kum ka dak ka jingithuh ia ka jingnoh synniang jong une u nongmihkhmat ha ki 30 snem ka jinglong nongïalam jong u.
Ka kyrwoh na ka BJP ha ka sngi Nyngkong ka ong ruh ba katei ka khusnam ka pyni ïa ka jinglong nongïalam kaba janai jong u Bah AL Hek kum u nongmihkhmat paidbah. La kdew ruh ba kane ka khusnam ka pyni ruh ïa ka rukom treikam bha jong ka party khamtam ha kaba ïadei bad ka roi ka pa kaba long salonsar.
