Nongstoiñ, Ïaiong 05: Ka Hynñiewtrep Youths Council West Khasi Hills District, ha ka sngi saitjaiñ ka la leit ban khang da ka bor ïa palat 180 tylli ki dukan jong ki bar jylla ha ïew Shallang, ki bym shym la don ïa ka Trading License na ka KHADC.
Ka seng ha ka jingïalam u samla Lumlang Kharsyiemlieh President bad samla Losbingnel Lyngkhoi President HYC Mawshynrut Circle, samla Denis Nongbak President HYC Shallang Area Unit bad ki para dkhot, ki la hiar kyndit ha ka por shiteng sngi ha ïew Shallang bad pynlong ka jingkhynra Trading License man la kawei pa kawei ka dukan jong ki bar jylla kiba don ha katei ka ïew.
Na ka liang u nongïalam ka HYC West Khasi Hills District, haba kren ha ki lad patai khubor u samla Lumlang Kharsyiemlieh President u la ong, “Lada phi peit ha ka jingïaid lynti ka Jaitbynriew, kane ka sngi ka dei ka sngi Kyrsiew thiah, namar ha ka 4 tarik Ïaiong 1829 ka dei ka sngi Kyrsiew thiah U Paiem Tirot Sing Syiem ka Hima Nongkhlaw u ba ïakhun thma bad ki Phareng”.
“Kumta na ka liang ka HYC West Khasi Hills District ngi wan mynta ban kyrsiew thiah shane, namar ba hapoh West Khasi Hills District kum ka ïew Nongstoiñ, ka ïew Rambrai, ïew Maweit, ïew Riangdo, ngi lah ban bat hi ïa ka kamai kajih. Balei hangne ngim lah bat ta ka daw ngi wan ban kyrsiew ïa ki paidbah ban ieng noh da la ki jong ki kjat”, u la ong.
U la ong ruh, “Ngi ieng ban kyrpad ïa ka KHADC kam dei shuh ban ai lad ïa ki bar jylla ban wan knieh ïa ki trai ri trai muluk shane hapdeng ka juk kyrduh kam. Ngi kyrpad ruh ïa baroh ba ngin ïatreilang ban ïarap ïa ki paradoh parasnam jong ngi kin ieng ha la ki jong ki kjat bad ngim dei ban ailad shuh ïa ki bar jylla”.
