Pyndep ka Raid Marngar ïa ka lehñiam ‘Tongdohkha’ ban pynim ïa ka riti.. dustur

Nongpoh, Ïaiong 06 : Da ki hajar ngut ki khun ki hajar jong ka Raid Marngar mynta ka sngi ki la leit ban ïashim bynta ha ka jinglehñiam paidbah kaba la tip kum ka Tongdohkha lane ka Beh Huleng, kaba dei ka jinglehñiam ba shisien shisnem ban pynneh pynsah ïa ka riti dustur ba bala buh naduh ki longshuwa manshuwa.
Ïa kane ka lehñiam la pynlong ha ka pung kyntang jong ka Raid Marngar ha Ri-Bhoi, ryngkat ka duwai, ka phirat bad ka kñia ka khriam ban kyrpad ïa U Blei ba un ïada bad sumar ïa ki khun ki hajar na ki jingpang jingshitom, ka khlam ka swar bad na kino kino ki jingsniew.
Kane ka jinglehñiam ka long ruh kum shibynta ban pynim ïa ka riti dustur bad ka longtynrai jong ka Raid, ha kaba shuwa ban sdang ka jingïatong dohkha, la pyndep shuwa ïa ka duwai bad ka nguh ka dem ryngkat ka kñia ka khriam katkum ka rukom bala buh da ki longshuwa. Hadien kane, ki paidbah ki lah ban hiar sha ka pung ban tong bad kem dohkha.
Haba kren ha kane ka sngi, u Paiem Richard Syiem, Syiem ka Raid Marngar, u la ong ba kane ka lehñiam ka dei kaba kyrpang tang ha ka Raid Marngar bad ka long shisien shisnem. U la batai ruh ba katkum ka riti, u Syiem u hap ban leit kyrpad sha u Syiem ka Hima Mylliem ban ïoh jingbit ban khrong musur ïa ka Iew Mawlong (Iew Nongpoh), kaba long shibynta jong ka jingïapynkhreh ïa kane ka lehñiam.
Shuh shuh, u la ong ba hadien ba la ïoh jingbit, ka Dorbar Raid ka pynlong ïa ka jingpynkhuid ïa ka iew bad ka khrong ïa ka bai musur shisien shisnem ha ka taïew banyngkong jong u bnai Ïaiong.
U la bynrap ruh ba ka dohkha kaba la ioh ha katei ka sngi ka dei ka bynta ne ka bhah jong ki khun ki hajar, hynrei ka lehñiam pat ka dei kaba kyntang jong ka Raid.
La ong ruh ba mynshuwa, ha ka Beh Huleng ki rangbah ki ju leit ban beh ïaka mrad Huleng shisien shisnem bad hadien bala ioh ïaka Huleng ki rangbah ki risa ki kynhoi bad wanrah pat haka khyrdop kaba dang buh haduh mynta mynne ban pyndep ïaka kñia ka khriam bad ban beh ïa ka khlam ka swar bad ka pang ka shitom. Hynrei mynta, namar ba ym don shuh kum kine ki mrad, la pynlong ïa kane ka lehñiam tang kum ka dak ban pynneh ïa ka riti dustur.
Ka pung kyntang ka dei kaba la buh kyrpang tang na ka bynta kane ka jinglehñiam, ha kaba ym shah ïa ki paidbah ban rung ne khwai dohkha kulmar hynrei tang ha kane ka sngi ba la buh da ka Dorbar Raid la shah ïa ki paidbah ban hiar sha ka pung.
Hadien ba la dep ka lehñiam, ki paidbah ki la hiar sha ka pung da ka jingkmen ban kem bad tong dohkha, ryngkat ka kynhoi bad ban rah pat shala ki jong ki iing ki sem ban bam doh.