Dawa pynshai ka HYC ba don jingkynnoh pyndonkam bakla 19 lak ba mang surok Shillong-Nongstoiñ

Shillong, Ïaïong 05: Ka Hynñiewtrep Youths’ Council (HYC) Sohïong circle ka la pan ka jingpynshai na ka tnat Public Works Department (Roads) ha kaba ïadei bad ka jingwengnoh ïa ki delineator ha shilynter jong ka surok Shillong-Nongstoiñ, kaba dei ka National Highway 44E (New NH-106).
Ka seng ka la kdew ba ka jingmang pisa kaba dei T. 19.43 lak bad ka la kynnoh ruh ïa ka PWD (Roads) National Highway Division, Shillong, ba ka la don ka jingkynnoh ba la pyndonkam bakla ïa ka pisa jong ki paidbah ha kaba la wengnoh ïa ki delineator kiba la dep ban pynïeng thymmai.
Ka seng HYC ka la pynpaw ruh ïa ki jingsngewkhia halor ka jingdon jong kiba bun ki par tih maw bad tih shyiap ha shilynter jong ka surok, da kaba kynnoh ba ka tnat ka la leh bym ïohi wat ba la don ki jingujor.
Ka kynhun ka la kdew ruh ïa ka jingkhang jong ka District Magistrate halor ki par kiba khlem don kiba khmih bniah bad kumjuh ruh ïa ki jingbthah jong ka National Green Tribunal, bad ka la kynnoh ba ka tnat ka la leh bym suitñiew ïa la ki jong ki jingkitkhlieh bad buh pat ïa ka jingim jong ki paidbah ha ka jingma.