Dawa ki Khristan ha India ban weng noh ïa ka FCRA Amendment Bill namar kan ïuhroit ïa ka jinglaitluid ki niam

Shillong, Iaiong 4: Ka All India Catholic Union (AICU) ka la dawa ba dei ban pynsangeh noh mardor ïa ka Foreign Contribution (Regulation) Amendment Bill, 2026 namar kane ka jingtyrwa pynkylla ïa kane ka Bill kan ïuhroit ïa ka jinglong laitluid ki niam bad ïa ka hok jong ki ritpaid.
ïa ka Foreign Contribution (Regulation) Amendment Bill, 2026 la wanrah ha ka Lok Sabha ha ka 25 tarik u Lber 2026. Kane ka aiñ ka pyrkhing ïa ka jingpdiang bad jingpyndonkam ïa ka jingnoh synñiang kaba nabar ri da ki riewshimet, ki kynhun ne ki karkhana.
Ha ka kyrwoh, ka AICU ka la ong ba ki riewngeit Khristan kin ym lah ban pdiang ïa kano kano ka jingkhanglad ne jingpynslem bad ki la dawa ba ïa katei ka bill dei ban pynduh pyndam noh shi syndon. Ka la pan ruh ïa ka jingkular na ka sorkar pdeng ba kam dei ban don kano kano ka jingpyrshang ban tehlakam ïa ki jaka pule ne ki jingdon jingem jong ki ïingmane ne Balang.
Kane ka seng ka la kdew ïa ki kyndon ha katei ka bill ba kan ailad ïa ki bor kiba dei khmih ba kin shimti ne ban weng noh ïa ka jingpyndonkam ïa ki jingdon jingem kiba la shah pynduh ne pynsangeh noh ïa ka FCRA Licence bad ki la ong, ba kane ka dei ka “jingwan kyntur pud kaba shyrkhei bha” ha kaba ïadei bad ka jingïoh jingïada na ka riti synshar.
Kila pynpaw ba kum kane ka bor ka pynkheiñ ïa ka hok kaba la pynkup bor ha ka Articles 25 bad 26, kaba pynthikna ïa ka hok ban mane laitluid bad ïa ka bor ban pynïaid ïa ki jaka pule bad kiwei kiwei.
Ka AICU kala buh jingkylli ruh ïa ka rekod treikam jong ka sorkar bad ka kynnoh ba ka jingpyntreikam ïa ka FCRA ha kine ki snem ka la ktah jur bha ïa ki jaka treikam kiba ïadei bad ka pule puthi, ka koit ka khiah bad ki kam kiba ïadei bad ka imlang sahlang.
Haba kdew ïa ka kaiphod jong ki 700 tylli ki jingthombor pyrshah ïa ki Khristan ha u snem 2025, kane ka kynhun ka la ong, ba ki riewngeit Khristan ki la mad ïa ki jingeh kiba khraw bad kim don hapdeng ka jingshngaiñ, ha kaba ki la don ki jingjia kum ka jingpynthud ïa ki jingïaduwai, jingïaseng ka jingpynjot pynpra bad ka jingthimbor kaba la ujor ha kylleng ki jylla.
“ïa kane ka mat ym lah ban shim kum ka mat ka ban pynhun ïa ka kam saiñ pyrthei, la pynpaw ha ka kyrwoh bad ka bynrap ba ki kane ka jingpynslem kan ym lah ban weng ïa katei ka jingsngewkhia jong ka imlang sahlang.
Ka AICU ka la buh ruh ïa ki mat jingdawa hakhmat jong ka sorkar, ba dei ban pynsangeh noh shi syndon ïa katei ka bill, ban khmih bniah laitluid ïa ka jingleh jong ka FCRA naduh u snem 2014 bad ban shim ïa ki sienjam ban tehlakam ïa ki kam ïaumsnam bad ki jingkren shun bad thombor pyrshah ïa ki rit paid.