Shillong, Ïaiong 4: U National President ka National People Party (NPP) uba dei ruh u Myntri Rangbah ka Jylla u Conrad K. Sangma ula pynkhreh ban leit ïalap elekshon kaba heh ha Bongaon, kaba hap hapoh ha Boko-Chaygaon constituency ha ka 6 tarik u Ïaiong, na ka bynta u kyrtong ka seng National People’s Party u ban ïkhun ïa ka elekshon jong ka Assam Legislative Assembly 2026.
Ki jingpynkhreh kila ïaid shakhmat ha Santi-Nijora Club, ha kaba ki nongialam kiba rangbah kiba kynthup ia u MLA Pongseng R. Marak bad Vice-President ka NPP u I. Hemochandra Singh kila khmih bniah ïa ka jingpynkhreh baroh ryngkat bad u kyrtong ka seng u Ganseng B. Sangma, uba ïakhun na ka 28-Boko-Chaygaon (ST).
La khmih lynti ba ha kane ka jingialang kan khring ia ki nongialam ka seng bad ia ki nongtrei ka seng na kylleng ki jylla, ha kaba ka NPP ka thmu ban pynsngew bad rah shajrong ia ki jingiohi jngai kum ka seng riewlum bad ban pyniar ia ki lynti iaid ki jongka hapoh ka jylla Assam.
Kane ka jinglong jingman kadei hadien ba dang shen, la plie ia ka ophis treikam ka seng hajan ka National Highway 17 ha Boko da u Hemochandra Singh bad u Myntri Sorkar ka Meghalaya u Marcuise N. Marak hadien ba kila ïalap elekshon baroh shi sngi hapoh kane ka constituency.
Ki nongialam ka seng kila pynpaw ba ki don ïa ka jingngeit kaba skhem halor ka jingnang roi ka jingioh jingkyrshan bad kam ba kala don ruh ka jingkiew ha ka jingwan rung ki dkhot kiba thymmai kiba kynthup na ka seng BJP bad Congress.
U Marak ula ong, ba ïa ka NPP la seng ha u snem 2012 bad kala ïar sted bha ha kylleng ki jylla ka thain shatei lammihngi bad kala pynsawa ïa ka sur jong ka jingkyrmen ba ka jylla Assam ka lah ban jied ïa u nongthawain uba nyngkong eh na ka seng NPP.
Haba kyntait ïa ki jingkynnoh ba ka ïaid ryngkat lang bad ka seng BJP, kumta ka NPP kala pynpaw ba kadei ka seng sain pyrthei kaba ïaid laitluid marwei kaba buh ïalade kum kata kawei pat ka bor ha ka jingiakhun ia ka elekshon.
