Ki trai ri trai muluk ha jylla Tripura ki kylla rit paid namar ym don ïa ka jingkyrsiew ri : Bah Samuel

Shillong, Ïaïong 04: U Nongïalam barim ka KSU u Bah Samuel B Jyrwa u la ïathuh ba u snem 1829 dei kaba la sdang ïa ka sngi jingpynbna ba ka jaitbynriew ka dei kaba la long longtrai ïa ka khyndew ka shyiap.
Haba kren ha ka jingïalang ka prokram jong ka Khasi Students Union ka Khasi National Awakening Day u Bah Jyrwa u la ong ba ha u snem 1993 la jer ïa kane ka sngi kum ka Khasi National Awakening Day. “Ka KSU ka la ïaid la bun bun snem bad ngi kum ki Khasi ngi long ka jaitbynriew kaba rit paidbah bad lyngba kane ka jingkyrsiew ri ka la pynthikna ïa ka jinglong trai ïa la ka jong ka khyndew ka shyiap,” ong u Bah Jyrwa.
“Ka Jylla Uttar Pradesh kaba don kumba 29 lak ngut ki khynnah pule klas 12, hynrei ki Khasi pat ngi long tang 24 lak. Ki riewlum ha Tripura naduh u snem 1950 shaneng ki la kylla long ki rit paid kim lah shuh ban ïa ïaid paidbah kumba la pynlong da ka KSU ha kane ka sngi bad lada ki trai ri trai muluk ha Tripura ki ïaid paidbah kin shah thombor ha kiwei pat ki jaitbynriew namar ki la kylla long rit paid ha la ka jong ka ri,” iathuh u Bah Jyrwa.
Haba ïathuh shaphang ki nong Tripura u Bah Jyrwa u la ong, “Ki la kylla long rit paid naba bun ki mynder ri na Bangladesh bad kiwei pat ki jait bynriew na kiwei pat ki jylla ka ri India ki la wan buhai shnong sha ka jylla jong ki.”
“Ngi donbok ba ka jaitbynriew Khasi jong ngi ka dang don ka jingshngaiñ haduh kine ki khyllipmat namar ngi ïai kyndit bynriew na ka por sha ka por. Naduh u snem 1987, haduh 1990 ter ter ka jait bynriew jong ngi ka ïai kyndit thiah na kawei ka por sha kawei pat bad sngewnguh ïa ka KSU ba ka la pynkyndit bynriew na kawei ka por sha kawei pat,” pynkynmaw u Bah Samuel.