Shillong, ïaïong 03: Ka Balarisha Thyrniang, Deputy Controller jong ka Civil Defence, Eastern West Khasi Hills, Mairang ha ka sngi Palei ka la ïoh ban khur ïa ka takma rnong ha ka jingïakop mareh kaba 10 Km jong ki kynthei (10 km Women Race Event) ha ka Khelo India Tribal Game, 2026 kaba long ha Chattisgarh.
Haba mihkhmat ïa ka Meghalaya ha katei ka lympung, ka Balarisha Thyrniang ka la pyndep ïa ka jingmareh hapoh 42 minit bad 29 sekon ban wan ha ka kyrdan ba lai ha ka 10 KM Women Race Event.
Lah ban kdew hangne, ha u snem ba la dep, ka Balarisha ka la wan ba nyngkong (1st Position) ha ka kyrdan rta jong ka bad ka la wan ba 3 ha ka kyrdan jong ki kynthei baroh kawei ha ka Asia Tata Mumbai Marathon kaba la long ha Mumbai.
Ki san tylli kiwei pat ki takma rnong jong ka jylla Meghalaya ha kane ka 1st Khelo India Tribal Game kidei kiba la khur da ka Bethlyne G Makri (women’s 10000m race walk), Melibad Kro (women’s shot put), ka Verem Gedaliah Nongsiej (women’s 50m freestyle swimming), ka Larityngkai Lawriniang (women’s weightlifting 53kg), bad u Juh Pa U Juh Nongtdu (men’s 60kg Greco-Roman wrestling).
