Shillong, Iaiong 1 : Katba ki nongbylla ki dang pynleit jingmut ha ka ban tih khyndew ban tei ïa ka ïing ha Qualapatty ha ka janmiet jong ka sngi Ba ar, kyndit kynsan ki la lap ïa uwei u kynja nar bad ki la suba jur ba udei u kuli tub ne u Shellbomb uba la rim bha bad kila pyntip noh mardor sha ki pulit ba kin leh ïa kaba donkam.
Ki nongbylla ki la lap ia une u kuli tub ha ka por janmiet katba ki dang pynleit jingmut ha ka jingtih khyndew ban pynkhreh ban shna ïa ka ïing bad kumba ïuh tdong bseiñ ki la kyndit ban lap ïa u kynja nar uba khia ïa kaba ki la suba jur ba u dei u kynja bom. Kumta mardor hi ki la pyntip ia ki pulit jongka Lumdiengjri Police Station.
Ki pulit haba ki la suba jur ba une u lah ban dei u bom uba ju siat na ki liengsuiñ kumta ki la pyntip ïa ka Bomb Squad bad haba kane ka kynhun kala wan poi ha kane ka jaka kala shim noh ïa une u kuli tub.
Ki pulit kila pynlong ïa ka jingtohkit ban pynthikna la une u kynja nar uba la lap na ka khyndew udei u kynja bom uba don ïa ki bakhor kiba khlaiñ uba pyndonkam ha ki por thma.
