Shillong, Iaiong 1 : Khatduh khatwai hadien ka jingtohkit bniah ki pulit ki la pynthikna ba ki la ïoh kem ïa u riew threwsnam uba pyniap ïa u khynnah khun swet ha Lum Marboh, Nongrah ha u snem 2025 uba kyrteng u Kenedy Khongsit 32 snem ka rta.
U SP ka East Khasi Hills ubah Vivek Syiem u la iathuh ha ka 8 tarik Risaw 2025 ha ka por kumba 8.20 mynmiet ki pulit ka Rynjah Police Station ki la ïoh ka jingujor ba uwei u khynnah khun swet uba dang 7 snem ka rta u la jah rngai na la ïing na Lum Marboh, Nongrah, Shillong, naduh ka por 4 baje janmiet. Mar mar ki Pulit Ophisar ba kiwei pat ki Pulit jongka Rynjah PS ki la leit sha katei ka ïing ba jah u khynnah khun swet bad la pyrshang ban wad ryngkat ka jingïarap ka Dorbar Shnong Nongrah ha sawdong bad marjan katei ka dong ba sah utei u khynnah hynrei ym shym la lap satia ha katei ka miet.
Ha ka step kaba bud ki pulit na Rynjah ki la ïoh pdiang ïa ka phone ba la lap ïa ka metiap jong u khynnah na Matngen, Mawpat. Mar mar ki Pulit Ophisar ryngkat bad ki Pulit langrut na ka Nongmensong Out Post ki la leit sha katei ka jaka. Hadien kane la wan sa kiwei kiwei ki Pulit Ophisar, ka CSU Unit jongka Forensic Science Laboratory. La lap ba la shu bret ïa ka met harud surok. Mar ïa ïohi kiba haïing jong utei u khynnah khun swet ki la kam ïa ka met jongu ba u dei u khynnah khun swet uba jah.
Halor kane la rejister case ha Rynjah PS kat kum ka Case no 295 (10) 2025 u/s 137(2)/103(1) BNS. ïa ka post mortem la pyndep ha NEIGHRIHMS bad lap ba ka dei ba la shu pyniap ïa u khynnah da kaba shu ksih.
Hadien kane haba ki pulit ki shim khia ïa kane ka jingjia na ka liang u SP u la thung ïa ka Special Investigation Team (SIT) happoh ka jingïalam u SP (City), East Khasi Hills. La rah ïa kiba bun ki briew ban tohkit hynrei ym lap dien satia. Ka kynhun tohkit ka la suba jur ïa ki katto katne ki briew kiba donkti tangba ym don jingpynshisha ban pynshisha bad kaei ka daw ba pyniap ïa u khynnah. Hadien kumba hynriew bnai ei ei ka SIT ka la trei bor bah kat ba ïoh ei ki sakhi sabut bad khatduh ka la lap dien ba uba pyniap u dei u Kenedy Khongsit 32 snem ka rta. Une u la phla ba u la pyniap ïa u khynnah khun swet ha ka por 2.30 ne 3 baje ei ei ha la ïing jongu Kenedy hi kaba don marjan bad ka ïing une u khynnah khunswet. Uba pli une u khynnah u la leit sha katei kaïing ban peit TV hadien ba la dep bam ja sngi. ïa ka met la kit da ka Scooty Yamaha RZ rong lieh da une u Kenedy bad kane ka scooty ka dei ka jong u para kha jongu. Namar une pat u leit sha lum bad ka kmie u Kenedy ban leit kheit tit. Ha kaba sdang u la phla ha ki pulit ba u la bthah ïa u khynnah khun swet ba un wanrah ïa u brut bad ka borti namar u dang sait ïa ka top Syntex hynrei une u khynnah khun swet u lapmiet ka peit TV. Da ka jingdom bad jingbitar ïa kane ka jingbym kohnguh une u kynnah bad haba u mih na la ïing u la ksih bad thep ïa u hapoh ka Syntex. Hadien kane u la buhrieh ïa ka met ha shakiar ïing. Nangta une u riew threwsnam u la thep ïa ka metiap ha ka byrni plastic bad kit da ka scooty utei u bakha jongu bad mih na Lum Marboh ha ka por 4.15 ne 4.30 ei ei bad wan phai tang hadien shiteng kynta hadien ba u la dep bret ïa ka metiap harud surok hangtei ha Matngen Mawpat. ïa une yn tian bishar hakhmat ka ïing bishar ban pan por ban set ïa u ha along ki pulit khnang ban ïoh tohkit bniah shuh shuh ïa u.
