Rai ka Kynhun Myntri ban pyntreikam noh ïa ka Provident Fund ïa ki Nonghikai Skul bad College

Shillong, Iaiong 1: Ka Sorkar Meghalaya ka la mynjur ban pyntreikam ïa ka Provident Fund Scheme kaba la sah teng la slem na ka bynta ki nongtrei ha ki bym dei ki skul bad college Sorkar kiba ïoh pdiang ïa ka Deficit Grants na ka jylla.
Haba pyntip ïa kane hadien ba la lum ïa ka jingïalang jong ka Kynhun Myntri, u Myntri Rangbah u Conrad K Sangma ula ong, “Ngi lah ai ka jingmynjur ban pyntreikam ïa ka Meghalaya Non-Government Schools and College Employees Centralized Provident Funds Scheme 2026”.
“Kumba phi tip, ki don bun ngut ki nongtrei ki bym dei ki skul sorkar bad college bad da kaba pynshong nongrim katkum ka Aiñ, ka la don ka jingnoh synniang kaba katto katne hynrei ka sorkar kam shym la don satia ïa ka scheme kaba biang ban pyntreikam ïa kane ka jingnoh synniang. Mynta ka sngi, ka kynhun myntri ka lah mynjur ïa katei ka scheme bad shisien ba kane ka la ïoh ïa ka jingmynjur bad katkum kane ka scheme hi, ki nongtrei ki bym dei jong ka skul ne college sorkar kin ïoh ïa ki jingmyntoi na ka Provident Fund”.
Ula ong, ba kane kan treikam na ka bynta ki nonghikai Deficit, ki nongtrei ha ki skul bad college shimet kaba la bei tyngka lyngba ka jingkyrshan ka sorkar kum ka St Anthony’s College, St Edmund’s College, Shillong College bad kiwei kiwei.
“Kine ki college kiba lah don ka dei kaba ka sorkar ka la ai ïa ka tulop ha ka dur jong ka deficit grant,” ong u Sangma.
Ki jingnoh synniang na kine ki nongtrei ka dei kaba la khate na ka Aiñ kaba la shim pateng na ka Assam bad pdiang lang da ka Meghalaya, hynrei kam shym la don pat kano kano ka scheme ban pynïaid ïa kane ka pisa sha ki ynda ki la shongthait na ka kam.
“Ka sorkar ha katei ka por kam shym la pynmih ïa ka scheme kumno ban pynïaid ïa ka jingnoh synniang ïa kaba yn ai biang sha ki nongtrei jong ki college bad skul haba ki la shongthait noh. Kumta mynta ka sngi kaei kaba ngi lah leh ka dei ba ngi lah mynjur ïa kaei kaei kaba la sahteng la slem bha bad kata ka dei kaei kaba ngi lah leh” ula bynrap.
U Myntri Rangbah ula ong, ba ym don ha kti ïa ki jingtip kiba bniah halor ka jingdon jong kine kiba ïoh jingmyntoi hynrei kane ka scheme mynta kan pynbiang ïa ka rukom treikam ha ka ban sam ïa kine ki jinglum ïa ka jingnoh synniang.
Haba kylli halor ka jinglut jingsep, u Myntri Rangbah ula pynshai da kaba ong, “Em, ka jingnoh synniang ka dei kaba lah dep ban leh lypa, kumta ka dei tang ka jingkylli ba ïa mynta yn sam sha ki baroh bad ka dei ban don ka rukom treikam bad ka scheme ka ban ïaid bad ka ban sam”.