Shillong, Iaiong 1 : Ki pulit ki la ïoh jingpyntip na Bethany Hospital ba uwei u khynnah uba dang 16 snem ka rta uba la wan kit da ka Ambulance 108 u la khlad noh shwa ban poi ha ka hospital namar haba ki doktor ki eksamin ki lap ba u la khlad noh ha lynti.
Une u khynnah uba dang pule Class 10 bad uba shu wan shuti sha Shillong dang ha ka 30 tarik Lber u la mih na la ïing na Motinagar ha ka por shiteng sngi ban leit kai sha ïing ki paralok ha Laitumkhrah bad u kpa jongu uba dei u Nongïasaid Aiñ u la bthah ïa u ban wan phai ïing noh 5.30 janmiet. Hynrei kaba lyngngoh ka long ba la lap pynban ïa u na kawei ka ïing hajan jingkieng Umpling ryngkat ka jingphlei snam na khmut. Ki trai shnong ki la phone bad pyntip mar mar sha ki kmie ki kpa bad pynkit ruh ïa u khynnah da ka 108. Ki pulit ki la leit sha katei ka jaka bad ïalam ïa ka kynhun Forensic CSU ban lum ïa ki sakhi sabut. ïa ka post mortem la pyndep ha NEIGRIHMS ban tip ïa ka daw ka jingiap. Ka jingtohkit ki pulit ruh ka la ïaid shakhmat.
