Khlem pat kem haduh mynta ïa uba thap ïa u nongñiah kali, kynnoh ka SKKBH

Shillong, Lber 31: Ka Synjuk ki kali Kamai ka Bri U Hynñiewtrep (SKKBH), nangta ki trai kali bad nongñiah kali, ba kynthup naduh ki tourist taxi, ki truck association, ki Auto Rickshaw, ki arshaka bad kiwei kiwei, ha ka sngi baar ki la leit ban ai da ka jingujor ha u Superintendent of police ka East Khasi Hills District u Bah Vivek Syiem halor ka jingjia ba shah ktah kti uwei u nongñiah kali ha uwei u briew kaba la jia ha kine ki sngi ba la dep bad na ka liang ka synjuk ka la ai por ruh shi taïew ïa ki ka bor pynïaid distrik bad kumjuh ruh ïa ki pulit ban kem ïa utei uba la ktah kti bad lada kim lah ban leh ïa kane, ka Synjuk kan sa pynbna da kiwei pat ki sienjam jingïakhih.
Ha kane ka jingleit ai jingujor ne ka formal complaint ka Synjuk hapoh ka jingïalam jong u Bah Balajied Jyrwa ka la buh hakhmat jong u SP ïa ki 3 tylli ki mat jingdawa kaba kynthup ba dei ban pynshitom katkum ka aiñ ïa utei u briew, nangta ban pyndam noh ïa Arms Licence jong u bad ban kem noh mardor ïa utei u briew uba la leh ïa kane ka kam ktah kti ïa u nongniah kali kamai.
Haba kren sha ki lad pathai khubor hadien ba la dep aiti ïa ka jingujor sha u SP u Bah Balajied Jyrwa u la ong ba ka seng kam lah ban shu shong haba ïohi ba u para nongniah kali kamai un shah thombor da kaba kam ba udei u briew uba don jingïadei bad ki bor sorkar bad ban pyntieng kohtympan da kaba sei ruh da ka suloi.
Haba kylli, u la kren da kaba shai ba utei uba ktah kti u dei beit uba don jingïadei bad ki bor sorkar bad u la pynpaw ka jinglyngngoh ba haduh mynta ki pulit kim pat kem satia ha kaba kane ka pyni ba ka aiñ ka treikam tang ïa kiba rit, kumba la ïohi ba u President HYC tangba u shu kren ha Motphran lah shah khot hajir katba ïa une uba thap ïa u para ba ñiah taxi haduh mynta khlem pat leh eiei.
Ka Synjuk Kali Kamai ka Bri U Hynñiewtrep ha ryngkat bad kiwei kiwei ki seng ki la pynlong ruh ka jingïalang hakhmat u Mot Tirot Sing Syiem uba don ha State Central Library, Soso Tham Auditorium Shillong.
Shuh shuh ha kaba ïadei bad kane na ka liang u Bah Jyrwa bad kiwei pat ki nongkren ha kane ka jingïalang ki la kyntu ïa ka tnat pulit ba kan shim kam da kaba pyrkhing bad kaba tyngeh halor ka jingshah thombor jong u nongñiah taxi kaba la jia ha ka 27/03/2026.
“Ha ka kyrteng jong Ka Synjuk Ki Trai Bad Nongñiah Kali Kamai Bri Hynñiewtrep, ngi pynpaw ïa ka jingpyrshah ka jingbym mynjur bad sngewkhia halor ka jingshah thap jong uwei u nongñiah taxi kaba la jia ha ka janmiet jong ka 27, tarik mynta u bnai, 2026. Ki dkhot jong ngi ki ai ka jingshakri kaba kongsan sha ki nongshong shnong bad kumjuh ruh ïa kiba wan jngohkai sha kane ka jylla, bunsien hap trei wat ha ka por mynmiet myniong hapdeng ki jingeh kiba hap ban mad. Kum kine ki jingleh kiba khlem da don ba kynshoit ne ai ding ban poi sha u pud ban ktah kti, kane ym tang ba ka wanrah ïa ka jingpang ha ka met bad ka bor pyrkhat jong u lanot hynrei ka thaw ruh kumjuh ïa ka jingsngew bym shong shngaiñ hapdeng baroh kawei ka kynhun kiba ñiah kali. Ngin ym lah bad ngin ym lah ban shah ïa ka jingshah ktah kti jong ki dkhot jong ngi katba ki dang pyndep ne leh ïa la ki jong ki kamram,” ong u Bah Jyrwa.
U la ong ba dei halor kane ba la dawa na u SP ba dei ban kem mardor bad ban pynngat hapoh ki kyndon jong ka aiñ, nangta shim kam da kaba tyngeh katkum ka aiñ ba ki pulit ki dei ban thaw da ka jingleh kaba khlaiñ khnang ba kum kine kin ym wanjia shuh hadien habud.
“La dawa ruh ba dei ban pyndam noh ïa ka Arms License jong u naba u la sei da ka suloi hapdeng kane ka jingjia pyrshah ïa u nongñiah. Ngi kyntu jur ïa ka ophis jong phi ban sdang noh ka kam ban wengnoh ïa ka arms license jong utei uba ktah kti mardor. Da kaba pyndonkam ïa ka tiar ban byrngem ïa u nongshong shnong uba khlem tiar ka pyni ba u long ka jingma ïa ka jingshong shngaiñ ïa ki paidbah,” ong u nongïalam ka Synjuk.
U la ong ba Ka Synjuk Ki Trai Bad Nongñiah Kali Kamai Bri Hynñiewtrep ka ïeng pura bad u lanot. “Ngi kyrmen ïa ka jingjubab kaba kloi napoh ka tnat pulit ban pynthikna ïa ka jingbishar kaba hok bad ba ka kam kaba ngi trei dei ban burom bad lada kam idon kano kano ka jingshim kam halor kane, kan pynbor ïa ka synjuk ban shim da kiwei pat ki sienjam ban ïada ïa ka bha ka miat jong ki dkhot jong ngi,” ïathuh u nongïalam Ka Synjuk Ki Trai Bad Nongñiah Kali Kamai Bri Hynñiewtrep East Khasi Hills, Meghalaya.