Haba ngi phai sha ka jylla jong ngi khamtam ka Ri Khasi bad Jaintia ki ju don ki Seng Samla Shnong man la ki shnong bad kine ki dei ki shnat jong ka Dorbar Shnong bad kawei pat na ki shnat ka dei ka Seng Kynthei ba don ha ki Shnong ki Shnong. Kine ki dei kita ki Lai-Mawbyrsiew jong ka synshar bishar shnong, ki dei kita ki met (organ) kiba pynlong ïa ka Synshar Shnong ka bakhlaiñ haba kine lai ki ïatrei ryngkat ryngkat. Ki Samla kum ka bor met, ki kynthei kum ka nongker nongda, nongri nongsumar bad ka Dorbar kum ka thymmei pyrkhat pyrdaiñ, kaba aibuit ïa ki rukom treikam bad kaba thaw lad kumno ban wanrah jingmyntoi ïa ki nongshong shnong. Ka long ka shlem ha kaba ki kam shnong ki ïaid, ki tyllun lyngba ki prokram ki ba ka shnong ka buh beit buh ryntih.
Lada dei ba ki Nongkitkam ka Seng Samla Shnong bad ki Seng Kynthei ki don bynta lang ha kaba shim ïa ki rai na bynta ka bha ka miat jong ki shnong ban don ka jingtip ka ba shai ïa ki jait skhim bapher bapher ki ba wan ha shnong, bad lada ka shnong ka kwah shisha ban trei na bynta ka jingbha lang jong baroh, ki ladei ban buh ïa ki Seng Samla Shnong bad Seng Kynthei kum kita ki nongpeit pyrman (Monitoring group) ïa ki Development Schemes baroh kiba wan ha shnong. Lada leh kumne ngin lait na shibun ki jingbamsap kumba paw ka jingïabam klop ki Rangbah Shnong bad Secretary Shnong na ki scheme MGNREGS, Khaw, Shana ICDS, Mid-day Meal, skhim paikhana bad kiwei kiwei.
Ym tangba ka Shnong ka lah ban lait na ka jingpynshoi jong ka jjingbam sap haba ïatrei para ba sngewthuh jingmut haba byrngut byrnget hynrei kan wanrah ruh ïa ka jingsynshar shnong kaba khlaiñ bad kaba baroh lang ki lah ban ioh ïa ka jingmyntoi haba shit bashai khlem khlem ka ïasuh buit sop sop. Kan paka ka jingpyntrei ïa ki surok lyngba ka PWD ne ka shna nala namar ba ka don ka jingtip bashai kumno la mang ïa ka pisa bad katno phut ne katno ka jingrben ka surok. Kumno kine ki kynhun trei mon sngewbha ha shnong ki lah ban pynkhlaiñ ïa ka jaitbynriew? To ngin ïa phai shiphang sha kata ka mat “Ka jaitbynriew” ïa kaba katto katne na ngi ngi la ngiah ban sngap ïa kane ka kyntien namar ba la bun kiba shim kabu palat ïa kane ka kyntien “Jaitbynriew”
Ngi ju ïa kren bad hylla “Ka jaitbynriew, ka jaitbynriew” u Seng Kieng atiar ruh Jaitbynriew, u Sengbhalang ruh Jaitbynriew, u Seng niam ruh Jaitbynriew, ngi ïatylli ruh na bynta ka jaitbynriew, ngi ïapait ruh para bynriew na bynta ka jaitbynriew. Mano ba dei uta u jaitbynriew? Hangno ka shong ka sah kane ka Jaitbynriew? Kumno ngin pynkhlaiñ ïa kata ka Jaitbynriew?
Shwa ban jubab ïa katei ka jingkylli, don kawei ka jing ong ha ka ktien Nongwei kaba ong, ” If you are weak, and you are in the relationship then that relationship is weak, If you, in a relationship and the relationship is in the family then the family is weak, If you, in a relationship in a family and if the family is weak then the society(shnong/Jaitbynriew) is weak”
Kaba mut ba ka jingkhlaiñ jong kata ka jaitbynriew ka sdang na nga ka sdang naphi, ka sdang na u Kpa ka ing, na ka kmie ka ing, ka sdang na ki khun shynrang bad khun kynthei ka sdang na ki shnong ba ngi sah. Mano ba dei uta u jaidbynriew-Dei ma nga, hooid dei maphi u ba dang pule ïa kane ka jingthoh mynta. Hangno ka shong ka sah kane ka jaitbynriew- Ka shong ha Shnong jong nga, ka shong ha shnong jongphi, ka shong ha Lummawbah, ha Mawlai, ha Jaïaw, ha Nongstoiñ, ha Mairang, ha Nongpoh, ha Patharkhmah, ha Lad thalaboh ka jaitbynriew ka shong ha man la ki shnong , ma nga ma phi ngi pynlong ïa ka jaitbynriew. Kumno ngin pynkhlaiñ ïa ka jaitbynriew-Ngin pynkhlaiñ ïa ka jaitbynriew da kaba ngi pynkhlaiñ ïa ki Shnong lyngba ka Synshar khadar kaba khlaiñ bad bym bam kruiñ. Lada ka Shnong Saiden, Umran, Mawiong, Nongthymmai,Smit, Nongkrem, Ummulong, Mairang, Nongpyndeng bad baroh ki shnong kiba don ha Ri khasi ki long kiba khlaiñ kumta ngin ioh ïa ka jaitbynriew ka ba khlaiñ, ka jaitbynriew ka shong ha ki shnong bad ka jingkhlaiñ kan wan nangta,ka jingnang jingstad kan wan nangta, ka koit ka khiah bapaka kan wan nangta, ka longing kaba skhem ka wan nangta bad ka Jaitbynriew hi baroh kawei ka mih nangta, ki shnong baroh ki pynlong ïa ka jaitbynriew, lada ki shnong ki khlaiñ ka wanrah ïa ka jingkhlaiñ ïa ki long ing, ka longing kaba khlaiñ ka wanrah ïa ka shnong kaba khlaiñ kumne markylliang bad ka jingkhlaiñ jong kine kan wanrah ïa ka jaitbynriew kaba khlaiñ bad baskhem.
Lada ki Shnong ki bamsap bad ka tlot kan long kum ka jingbampong ki shyieng namar ka jingpang ka sam shaduh tynrai jong ka shlem bamih ka jingim-ka snam.
Nud ban sdang na la shnong, nud ban wanrah ïa ka synshar ba khuid bad ba skhem, nud ban kynthup ïa ki dkhot ka seng Samla shnong, nud ban kynthup ïa ki dkhot ka Seng Kynthei ha ka Executive Dorbar watla horkit hordang kin ym lah ban pynmih tmaiñ ban shong Dorbar, hynrei ha ba ka por ka dawa, to pynjynsur ïa ka pyrkhat ioh ba u tmaiñ un tan ïa ngi shiphew pateng shadien.
