Ym don jingduna tyndong lyer shet jingshet ha ka jylla, ong ka Director Food Civil Supply

Shillong, Lber 30: Ka Director Food, Civil Supply and Consumers Affairs ka Saloni Verma IAS, ka sorkar Jylla ka la ïathuh ba kam shym la don kano kano ka jingthut ha kaba ïadei bad ka jingpynpoi bad jingpynbiang ïa ki tyndong lyer shet jingshet ha ka jylla.
Haba kren sha ki lad pathai khubor ha ka sngi nyngkong ka Director ka la ïathuh ba ha shwa ban sdang ka thma, ha shwa ka 11 tarik mynta u bnai Lber ha ki ri phang Pdeng mihngi (Middle East) ka jingïoh ka jylla ïa ki Domestic Gas Cylinder ka long 6 haduh 7 hajar ha ka shi sngi bad hadien ba la mih ki kynrum kynram namar ka thma ha Middle East hadien ka 11 tarik mynta u bnai ka jingpynpoi jong ki Domestic Gas Cylinder ha jylla ka la long 5 haduh 7 hajar ban pyndonkam ki paidbah ha ka shisngi.
Haba ïadei pat bad ki Commercial Gas Cylinder kaba ju pynpoi da ka Sorkar Pdeng kumba 1 hajar tylli ha ka shi sngi hynrei mynta hadien ba khie ka thma ka jingïoh ïa ki commercial Gas Cylinder ka long kumba 200 haduh 250 tylli ha ka shi sngi.
Halor ki kaiphod ba ki paidbah ki hap ïeng laiñ lypa ban ïoh gas ka la ïathuh ba kadei tang na ka daw ba ki hap ban pyndep ïa ka e-KYC.
Ka la ïathuh ba ka jingai bhah ïa ki commercial LPG sha baroh ki jylla kynthup ka Meghalaya ka la kiew sha ka 70% na kaba ju ai, bad bynrap ba ki domestic LPG kin ïai neh kumjuh.
Ka la ong, “Katba ka jingïakren ka dang ïai bteng bad ka Sorkar India ka la shim jingkheiñ ïa ka jinglong jingman ha kiwei ki Jylla, ki la pynkiew ïa ka jingpynpoi ïa ki LPG commercial. Ïa mynta ka jingai LPG commercial ka la kiew sha ka 70% na kaba ju ai sha baroh ki Jylla.”
Shuh shuh ka Verma ka la ong, “Mynta ngi dei hok ban ïoh 70% bad ka jinglong jingman kan sa kham biang na ka bynta ki tourism operator, ki dhaba, ki restaurant bad ki hotel,” bad pyntip ba ka Sorkar India ka la pynjari ïa ka 20% ka jingpynduna ïa ki LPG commercial naduh ka 11 tarik Lber namar ka jinglong jingman ha Middle East kaba pynthut ïa ka jingshalan.
Ka Meghalaya ka donkam kumba 1000 cylinder ha ka shisngi, namar ka 20%, ka jingpoi cylinder ka la hiar sha ka 200-250 shisngi, kaba wanrah ïa ka jingduna na ka bynta ki hotel, Dhaba bad ki restaurant.
Ki hospital bad ki jaka pule ki dang ïai bteng ban ïoh beit pura ïa ka jingsam LPG kumba ju ïoh.
Naduh ka 25-27 tarik Lber, ka jingpoi LPG ba manla ka sngi ka la kiew sha ka 300-350, ka la ïathuh ba la pyntip ba ka jingai LPG ha kine ki lai sngi ba la leit noh ka la kot sha ka 400 namar ka jingtreikam ka 70% ka jingpynkiew bhah.
Ha kawei ka liang, ka Director ka la pyntip ba kam shym la don satia kano kano ka jingthut ha ka jingsam ïa ka domestic LPG.
Shuwa ka jingpoi duna gas, ka jingsam ïa ka domestic LPG ka long hapdeng 6000-7000 cylinder ha ka shisngi, bad hadien ka 11 tarik Lber, ka Jylla kala lah ban ai hapdeng 5000-7000 shisngi.
Halor ka jingïeng laiñ u paidbah ha ki jaka sam gas, ka Director ka la ong ba kane ka jingïeng laiñ ka dei namar ka jingdonkam ban leh ïa ka e-KYC na ka bynta ka De-duplication certificate ba donkam ïa kiba leh connection thymmai, ka sienjam kaba ki kompeni kila pyntreikam ban khanglad ïa ka jingthied ban pynlang ïa ka LPG. Hapdeng ka 25 bad 27 tarik Lber, ka Jylla ka la sam haduh 22,094 tylli ki domestic cylinder.
Ka Verma ka la kyntu ïa ki lad pathai khubor bad ki paidbah ba kin kiar na ki jingkam ba duna LPG kaba lah ban pynkhuslai bad pynkulmar jingmut ïa u paidbah.
Ka la ong, “Ngi la dep thung ïa ki District LPG Monitoring Committee, State Level LPG Monitoring Committee bad kine kila peit thuh bha ïa ka jinglong jingman.”