Na ki 17 tylli ki bynta ba kongsan, 75% rai u DC ban pyntreikam ïa ki rukom thungkam thymmai

Shillong, Lber 30: U Nongwad RTI napoh ka East Jaiñtia Hills District u Bah Reachingson Siangshai u la ïathuh ba ki bor pynïaid distrik lyngba ka District Selection Committee ka la shim ïa ka rai ban pyntreikam noh ïa ki rukom pynkylla thymmai ha ka thungkam thungjam jong ka DSC ha ka district bad ban pynkylla shuh shuh ïa ka rukom treikam jong ka DSC.
Haba kren sha ki lad pathai khubor ha ka sngi Nyngkong u la ïathuh ba ha u taïew ba la dep ha ka 18 tarik mynta u bnai u la pynkynmaw haduh 2 sien sha u Deputy Commissioner kawei kadei ha ka 9 tarik u Rymphang bad ha ka 18 tarik mynta u bnai naba u DC u dei u Chairman ka DSC ban batai ïa ka rai jong ka jingïalang jong u DC barim kaba la long ha ka 27 tarik u Naiwieng 2025.
“Ha ka jingïalang kaba 18 tarik mynta u bnai u DC ba thymmai u la ïathuh ba un sa pyntreikam ïa baroh ki rai jong ka jingpynbha ïa ki rukom treikam ka DSC bad kumba 70 haduh 75% na ki 17 tylli ki bynta, ka DSC ka la rai ban pyntreikam katkum ka jingthoh ba la phah da u DC khnang ba ki samla kiba aplai kam kin tip,” ïathuh u Bah Siangshai.
U la ïathuh ba ka DSC ka la shim ka rai ba ka qualifying marks ne ka qualifying criteria ban pass sha kawei ka kyrdan naduh ka physical test, ka language test bad ka written test kin sa pyntip lypa sha ki nong aplai kam, ym kumba long mynshwa ba kim ju pyntip.
“Nangta ha kaba ïadei bad ka jingpynmih shuh shuh ïa ki kam wat hadien ba la dep ka jingthungkam bad halor kane ruh la dawa ba kum kine kim dei shuh ban jia bad ïa ki kam kiba thymmai kiba lait dei ban thep ne pynmih noh ha kawei pat ka eksam thungkam ka ban sa pynbna thymmai hadien bad ïa kane ruh ka ophis DC ka la pdiang bad haba ïadei bad ki jinglait jong ki kam dei ban pyntip sha baroh ki lad pathai khubor naduh ki watsaaps, email, SMS bad halor kane u DC u la pyntip ban sa pynbeit bad ka DIC lyngba ka NEC kaba don ha distrik bad halor ka advertisement thungkam jong u snem 2025 kin pyndep noh ha u bnai Ïaïong bad Jymmang mynta u snem,” pyntip u Bah Siangshai.
U la pyntip ruh ba la dawa ban arset ki jingkylli ha ki sngi thoh eksam bad ka shong ha ka DSC ban shim ïa ki jingkylli kyllum kaba lah ban dei na ka set kaba 1 ne na ka sat kaba 2 bad ka DSC ka la rai ruh ban bud ïa ki jingkdew katkum ki kyndon haba ïadei bad ka jingthungkam thungjam hapoh ka Distrik.
U Bah Siangshai u la ong ba katkum ka jingpynbeit kaba la pynmih na ka ophis jong u Deputy Commissioner ka East Jaiñtia Hills District ïa ki kam kiba lait ha DC kiba lah ban aplai dei tang kiba na ka district.
Na ka liang jong u, u la kyntu ïa ki ar ngut ki MLA u Bah Kyrmen Shylla bad ka Kong Santa Mary Shylla ba kin buddien ïa kane ka rai kaba la shim ha ka jingïalang jong ka District Selection Committee bad ka jingkhublei ka long ïa ki dkhot ka DSC ruh kumjuh.
U la ïathuh ba la jan baroh ki mat kiba donkam kiba la ïa kren ha ka DSC la pyntreikam bad kiba sah ka long sa tang kiba ïadei bad ka tnad Personal kaba ki dang hap ïa pynbeit ïa kaba u la leit ban ai ïa ka jingthoh.