Thret kumba ïuh tdong bseiñ kyndit bynriew ka KHADC bad JHADC na ka jingjia ha GHADC kwah pynkylla AD Rules

Shillong, Lber 29 : Thret kumba ïuh tdong bseiñ kyndit bynriew ka Khasi Hills Autonomous District Council (KHADC) bad ka Jaintia Hills Autonomous District Council (JHADC) na ka jingjia ha ri lum Garo kaba la wanrah ka jingïa umsnam tang na ka daw ba ïoh ïashim bynta ki bar jylla ha ka election MDC bad dawa ban pynkylla noh ïa ka kyndon 128 jongka AD Rules khnang ban khanglad ïa ki bar jylla ban ïashim bynta ha ka election sha ka Garo Hills Autonomous District Council kaba dei ban ïashim bynta tang ki jaidbynriew trai ri trai muluk.
Kane ka kyndon ka don ha ka AD Rule jong ka KHADC bad JHADC ruh hynrei ka jingïapher ka long ba hangne ha Khasi bad Jaintia naduh ba sdang ki bar jylla ki khlem ïoh ïashim namar ka jingtbit jong ki nongïalam ba mynshwa ban ïalam lynti khlem kano kano ka jingïaleh pyrshah ki bar jylla ruh ki khlem wan ban ïashim bynta hynrei ha ri lum Garo pat naduh ba sdang kata naduh 1952 ki la ïoh ban ïashim bynta ha ka election. Na kata ka daw ka kham eh bad shitom ha ri lum Garo dei tang hadien ka jingïakhih ki paidbah ba la wanrah ïa ka jingpynkylla ïa ka AD Rule ha GHADC bad ïoh ruh ka jingpynskhem na u Lat ka jylla.
Mynta ka KHADC bad ka JHADC ruh ki la pynkhreh shaid shaid ban wanrah ka jingpynkylla ïa ka AD Rules. Kumba la kren da u nongpathai khubor jongka KHADC uba dei ruh u EM Land u bah Powel Sohkhlet uba dei ruh u Joint Editor ba mynshwa jongu Mawphor, u la ong ha KHADC ki lah ban wanrah ka jingpynkylla ym tang ïa ka kyndon 128 hynrei kin dang bishar bniah namar lah ban wanrah jingpynkylla ha kiwei kiwei ki bynta ruh. U la ong ba kin ym bud tynneng thik kumba leh ka GHADC hynrei kin dang bishar bniah sani bha shwa ban shim ïa ka rai ban wanrah ka jingpynkylla.
Kumjuh ruh ka JHADC ruh ka la wan ïa kynduh ïa u Myntri Rangbah ka jylla bad ka ruh ka kwah ban pynkylla ïa ka kyndon ba 128 jongka AD rule. Kumta shen kine ki ar tylli ki Council ruh kin sa wanrah ka jingpynkylla ïa katei ka kyndon aiñ.