Shillong, Lber 29 : Ka VPP Youth Wing hynne ka sngi ka la leit ban ai jingkyrshan ïa ki Seng Longkmie Rngi Shillong da kaba leit kynsan ban khynra ha Lumshyllong ha kaba ka la lap bun ki nong khalai, ki nong die kyiad beain, ka ktem buh kyiad jong ki briew sha khlaw kaba ka shem ba ka long kaba i shyrkhei haduh katta katta.
Ha ka kyrwoh ba la phah da u President VPP Youth Wing, Bah Marbud Dkhar la ïathuh ba katei ka jaka ka long kaba i shyrkhei bha namar bun bha ki kali ba ieng ban ïa leh ki kam sniew ha rud surok nalor ba ka pynwit ruh ïa bun ki kali ki paidbah ba leit ba wan nakatei ka surok.
“Kane ka buh jingma ruh ïa ki nongshong shnong bad ïa ka imlang sahlang namar ki briew kiba don kti ban ïaleh ïa kine ki kam sniew ki ïashong bun bha bad haduh da miet khamtam sngi Saitjain, Sngi U Blei ki ju wan ban pynlut por ha utei u lum ban ïa dih ïa bam, tla sih tla sang bad pynwit bad shong syier ïa ki paidbah ba ïaid ba ieng,” ong ka kyrwoh.
La ïathuh ruh ba ki la don bun bha ki paidbah, ki senglong kmie kiba la ud la nam sha ka VPP youth wing bad ong ruh haba ki seng longkmie ki leit khynra hi teng teng ki ju shah niew bein bad shah beh krad kylla.
“Ka VPP youth wing kam banse ban mih shakhmat ban ai jing kyrshan ïa ki senglongkmie ban rat dieng khong ïa kine ki jingsniew. Kane ka jingleh jong kine ki briew ka buh jingma ïa ki shnong ki thaw, ka imlang sah lang ka pynjot ïa ki samla, ki rangbah ki iing ki sem, kam wanrah jingshngain shuh namar la jur palat ka kam khalai, die kiad beain, kam awria. Ka Youth wing ka maham da ba tyngeh bad kyntu ïa ki briew ba ju mlien kine ki kam ba ki dei ban sangeh syndon kine jait kam, namar kitei ki jaka ha lumshyllong ki bun bha ki nongwan jngohkai ki wan kai bad lada pyni noh ki trai shnong kumne ki wei kiba na bar kin nymkhein shuh bad leh katba ki mon,” bynrap biang ka kyrwoh.
Shuh shuh la ïathuh ba ha ka jingkhynra ha kane ka sngi la lap bun ki nongkhalai bad ïoh ruh ban kurup bun bha ka kyiad ha da ki seng longkmie. La ïathuh ba ki don bun bha kiba leh kam sniew ki la ïoh ban phet sha khlaw ha katei ka jingleit khynra kynsan jong ka youth wing.
Halor kane ka VPP youth wing bad kumjuh na ka Seng Longkmie ka maham jur ba lada lap biang kum kine kan leh da kaba tyngeh bad kan nym aili ne map ïa kum kitei ki jait kam be-ain kin don hapoh Lumshyllong. Ka la maham ruh ba kan dang ïai bteng ban khynra na ka por sha ka por.
