Ha Shillong shu sniew malu mala ka surok, la siang rong, sha nongkyndong ym shym khia ka sorkar

Shillong Lber 29: Kan long kaei kaei kaba long kumba leh shilliang ne kaba shu ïada rap jot ïa kaei kaba la ïohi bad paw paidbah.
Katba kiba bun na ki shnong kiba don ha ki thaiñ nongkyndong kida angnud shisha ban ïoh ïa ki surok kali kiba biang khnang ba kin lah ban pynkit ïa ki marrep ban lait na kaba kit da met, hynrei kim ïoh satia da kiba bun bun snem, katba ki surok kali kiba don ha Shillong, watla ki sniew malu mala hynrei la maramot bad siang rong.
Ha kine ki Sngi la ïohi shisha ba ki don ki surok ha Nongbah Shillong kiba kham paw khmat bha watla ki la shu sniew malu mala hynrei ka sorkar jylla lyngba ka tnat ba dei peit manla ka miet ka la durïap dukhi khait ban maramot bad ban siang rong kloi ïa kine ki surok.
Katba kiba bun ki shnong sha ki thaiñ nongkyndong, la ka dei sha ka thaiñ Ri Bhoi, sha ka thaiñ West Khasi Hills ne wat sha Jaiñtia Hills District ruh ki dang don bun bah ki shnong ki bym pat ïoh surok rong watla ki la dawa ne pynpaw ïa ki jingangnud lah da ki phew phew snem.
Lah ban ong ba ki don ruh ki shnong ha kaba ki nongshong shnong ki hap ban shu kit da ka khoh ne da ka met lada don mano mano kiba pang ha ki shnong jong ki tang na ka daw ba ki shnong jong ki kim pat ïoh surok rong.
Hynrei haba phai pat sha sor Shillong tang shu la don kiba dawa pynbha ne maramot surok ka sorkar lyngba ka tnat badei peit kam da pynslem hynrei la ïohi ba tang hapdeng katto katne la ïohi ba ki la don kiba wan maramot, kumta kumba ïohi, imat ka sorkar ka kham sngewtynnad ban ïada rap jot ban lait na ki jingleh raiñ ban ïa kaba pynbha ne Siang rong ïa ki surok ki shnong ha ki thaiñ nongkyndong khamtam kito ki shnong kiba pynmih bha ïa ki marrep.
Ha kaba ïadei bad kane lah ruh ban ong ba ka sorkar watla ka la pyrshang ban maramot ïa kiba bun ki surok sha kiba bun ki shnong, hynrei khambun sien pat la ïohi ba ki shnong kiba dei hok ban ïoh ïa ki surok naba ki long ki jingmyntoi ïa ka jylla hi baroh kawei kim ïoh satia ïa ki surok kiba biang, kumta ka la dei shisha ka por ïa ka sorkar ba kan phai khmat lem ïa kiwei pat ki shnong kiba donkam shisha ïa ki surok khamtam kito kiba donkam ban ïoh ki surok na ka bynta ban pynkit ïa ki marrep jong ki sha ki ïew ki hat kiba don ha kylleng jong ka jylla bad khamtam eh kiba don ki jingthmu ban shalan sha kiwei pat ki jylla jong ka ri bad kumjuh ruh wat shabar ri ruh kumjuh.