Khynra ki pulit ïa ki ktem awria bad kem 16 ngut ki thei suba die met bad 4 ngut ki bhuruwa

Shillong, Lber 29 : Ha ka miet Sngi Saitjain ki Pulit ka East Khasi Hills ki la pynlong ka jingkhynra ïa ki ktem awria kiba jur ha kylleng ki jaka jong ka Sor Shillong bad ïoh kem 16 ngut ki thei ba suba die met kynthup ïa 4 ngut ki Bhuruwa ne ki Nongpynïoh kynthei.
ïa kane ka jingkhynra la pynlong ha ki bynta ka surok na Khyndailad Pegasus Hotel sha Presbyterian English Service Church mar pyrshah ka SBI Main Branch, Shillong, nalor ki bynta ka surok mar pyrshah ka Ophis MBoSE, Lachumiere, Shillong bad IGP Point.
U Superintendent of Police ka East Khasi Hills u Bah Vivek Syiem, u la ong “ ïa kane ka jingkhynra la pynlong hadien ba la ïoh pdiang ïa kiba bun ki jingujor na ki nongshong shnong ba ki nongtrei kam awria (sex workers) ki la treikam na ki jaka bapher bapher kiba don marjan ki jaka leh niam kata ki ïingmane bad Gurudwara.
Ula pyntip ba ka jingujor ka kren ruh halor ka jingnang kiew ka jingdon ki briew kiba don ïa ka jingpang HIV ha shillong.
U Bah Vivek u iathuh ba ïa kane ka jingkhynra la ïalam da u Addl SP (Operation) Bah Ivan Diengdoh, ba la synran lang da ka DySP WCC Kong Jyoti Wahlang, OC ka Sadar Police Station, O/C ka Women Police Station ka Laitumkhrah bad kiwei ki Ophisar ka District.
Ha kane ka jingkhynra, 16 ngut ki briew ki la shah kem na kitei ki jaka ba la kdew haneng katba ki dang leh ïa ki kam kiba dei ki kam die met bad kam awria.
Saw ngut na kiba shah kem ki dei ki Bhuruwa ne ki nongpynioh shynrang ne kynthei na ka bynta ka kam leh awria, kiba shim ïa ka bynta ba kongsan ha ka jingpynbeit ïa kane ka kam bymman.
Ki Pulit kila kurup ruh ïa kawei ka Swift Dzire bad 2 tylli ki scooty kiba pyndonkam ha kane ka kam bymman.
Ki Pulit kila rejister case ha Sadar Police Station hapoh ka kyndon 4/5/7/8 The Immoral Traffic (Prevention) Act pule lang bad ka kyndon 110 jong ka Meghalaya Police Act pyrshah ïa kine ki briew.