Palat 4 hajar ngut wan ki paidbah sha ka tamasa shet jingbam ka Culinary Cascade ha Nan Polok

Shillong, Lber 29: Ka 3rd edition jong ka Culinary Cascade ne ka tamasa bam, kaba dei ruh ka jingrakhe ïa ka rukom shet jingbam kaba hiar pateng ha Meghalaya ka la khring ïa kiba bun ki paidbah ha ka sngi kaba la pynkutnoh ïa ka ha ka prokram kaba la pynlong ha Ward’s Lake Shillong.
Ha kine ki arsngi ha kane ka prokram ki la don ki jingïasyllok kiba don jingmut, ka jingshet jingbam kaba pyni paidbah, ka jingpynlait ïa ki jait jingbam, ki jingïoh mad ïa ki jingtip kiba kham kloi, nangta ka jingïalong kawei ka rukom shet jingbam, ka kolshor bad kiwei kiwei. Kane ka tamasa ka la khring ïa kumba 4,000 ngut kiba wan jngoh da kaba pynïasoh ïa ka rukom shet bam lyngba ka riti dustur bad ki jingshem ba thymmai. Ka pyni ruh ïa ka jingangnud jong kine ki thaiñ ban ïasam ïa ki rukom shet bad ka pyrthei.
Ha ka sngi baar ka kynthup ïa ka jingïasyllok halor ka rep ka riang bad ka jingïakren ba la lamkhmat da ka Daphi & Symbai. Ka book conversation bad Dr. Madeline Tham ba la batai ïa ka jingïadei hapdeng ka bam bad ka jingithuh deiriti. Ha ka tamasa u Bah Kitdorlang Kharpran, Assistant Director ka Horticulture bad u head ka Mushroom Development Centre ha Shillong, u la ai ka jingpynsngewthuh kaba kyrpang shaphang ka rukom rep ïa u tit bad ki kam kiba lah ban pynmih ïa ka ïoh ka kot.
U Timothy D. Shira, u Myntri ka tnat Tourism, ha ka jingkren u la ong, “Ka Meghalaya ka dei ka jylla kaba don kiei kiei kiba long phylla. Ki khlaw, ki wah, ki khyndew ki pynmih ïa ki jingbam kiba bha kiba long phylla. Kaei kaba ka Culinary Cascade ka leh kadei ba ka shim ïa kine ki jingmyntoi ba bun bad ong ban peit ïa kaei kaba ngi don bad kaei kaba ngi lah ban tei da ka.”
U la kdew ba ha kine ki 2 snem ba la leit, ki nongrep ka Meghalaya, kiba buh restaurant, bad kiba shna wine ki la shim ïa ka bynta kaba kongsan ban rah ïa ki jingiwbih ka jylla shalyndet ki pud ki sam. “Kane kam dei tang ka kolshor, kane kadei ka ïoh ka kot kaba ka sorkar ka angnud,” u la bynrap.
U la ïathuh ruh ka jingïatreilang bad ki seng kum ka SEETI ban pynbha ïa ka pateng bathymmai ba kin shemphang ha ka kam shet jingbam.
Katba u Dr. Shakil P. Ahammed, IAS, Chief Secretary, u la ong ba ka Culinary Cascade kam dei ka jingjia kaba tang shisien hynrei ka jingkyntiew ïa ki kam jngohkai ka Meghalaya bad ki jingkiew ha ka sengkam lajong.
Katba ka kong Brenda Pakyntein, MCS, Director, Department Tourism, ka la khot ïa ka Culinary Cascade 2026, kum ka tamasa kaba wanrah lang ïa baroh ki nongshet, ki riew ieid bam bad ki nongshem thymmai. Ka Chef Ahmedaki Laloo ka A’Origins and Curator ka Culinary Cascade ka la ong, “Ngi rakhe ïa kaei kaba la wanrah lang ïa ngi shisha ha kiba bun ki liang.”
La ïoh ka jingpyrngia na ka PHP, Syntung Music Band, bad Sur Na Nongkyndong kiba la tem hapoh ka Chief Minister’s Meghalaya Grassroots Music Program (CM-MGMP).
Ha ka tamasa la sakhi ka jingpynlait ïa ki 2 tylli ki tiar ba thymmai da kiba sengkam la jong hapoh ka PRIME Meghalaya Red Rice Brew da Rida Sten Cottage bad Mushroom Pickle da Tassiana Jyrwa.