Ka Head Quarter ka NEEPCO ka dei ban don beit ha Nongbah Shillong, Ong u Myntri Khynnah ka sorkar pdeng

Nongpoh, Naitung 13: Kumba ha kine ki sngi ba la leit noh la don ka jingkynnoh ba ïa ka ophis NEEPCO yn rah noh sha Guwahati bad la don ruh kiba la dawa na ki Seng Bhalang ba dei ban pynneh ha Shillong, hynrei kumba la ioh lum jingtip la kynnoh ba ki heh ophisar ka NEEPCO kynthup naduh u CMD ki la treikam na Guwahati bad kim wan shuh sha Shillong.
Kine ki jingkynnoh ba la rah noh ïa katei ka ophis treikam ka NEEPCO sha Shilong ka la paw pyrthei ruh wat ha ki lad pathai khubor bad la don ruh ki kynhun Seng Bhalang kiba la dawa ba dei ban pynneh, hynrei kane ka jingdawa kumba ka long haduh kine ki sngi kam shym la seisoh bad la ioh jingtip ba ki heh ophisar ka NEEPCO ki la treikam na Nongbah Guwahati bad ym shuh kum mynshuwa ba ka Shillong la tip kum ka Head Quarter ka NEEPCO na Shillong.
Halor kane ka bynta ban pynthikna la ïa ka ophis ka NEEPC la rah shisha neem sha Shillong, u Nongthoh Khubor mynta ka sngi u la ioh ban ïa kren bad u Myntri khynnah ka sorkar pdeng uba dei peit ïa ka tnad bording, u Krishan Pal Gurjar, ha kaba u la pynshai ba ka ophis ka NEEPCO ka dei ban long beit kum ka head quarter na Shillong bad ym na Guwhati.
Ïa kane la ïathuh da utei u myntri khynnah ka sorkar pdeng, u Krishan Pal Gurjar, kaba dei hadien ba la buh jingkylli da u Nongthoh Khubor ha ka jingwan iuh kjat jong u mynta ka sngi ha Ri Bhoi kaba u la kynduh ïa baroh ki ophisar sorkar na Ri Bhoi, kaba dei halor ka thong jong ka Aspirational District, ba ka Ri Bhoi ruh ka la shah jied kum kawei na ka Aspirational District napdeng ki 115 tylli ba la shha jied ha baroh ki District hapoh ka ri India.
Haba pynthikna la ïa ka ophis NEEPCO yn buh kum ka head quarter ha Shillong ne ha Guwahati, utei u Myntri Khynnah ka sorkar pdeng, u Krishan Pal Gurjar u la kren shai ba haduh mynta hi ka ophis ka NEEPCO la tip ha Shillong ba ka dei kum ka Head Quarter bad baroh ki jingtreikam ka dei beit na Shilong bad ym na Guwhati, u la pynshai ïa ka jingkylli u Nongthoh Khubor.
Shuh shuh, u la pynshai ruh naduh ki nongtrei sorkar kiba trei ïa ki kam barit bad haduh ki kam kiba heh, baroh ki ophisar ki dei ban treikam na Shillong bad ym na Guwhati bad u la pynthikna ruh haduh mynta kam pat don kano kano ka jingshim rai ba yn rah noh ïa ka ophis treikam kaba heh ha Guwahati bad ka dei ban neh beit kumba long mynshuwa ba ka ophis treikam ka NEEPCO ha Shillong ka dei ban long ka Head Quarter, u la bynrap.