Mawkyrwat, 28 Lber : Kawei ka bus kaba kit ïa ki nongshang kai pyrthei ne tourist na Garo Hills ka la shah ïa ka jingaksiden ha ka miet 27 tarik Lber, 2026 ha ka por kumba 10:00 baje mynmiet hajan ka shnong Mawranglang, kaba hajan jingkieng Wah Rilang.
Katei ka kali kaba don u registration number AS 18 AC 0155 ka kit haduh 48 ngut ki nongleit nongwan bad ka dang wan na Mawsynram bad thmu ban leit phai sha Medi Rong Rong Resubelpara ba la ñiah da u Akon Nath (39 snem), uba dei na Goalpara, Assam.
Haba poi ha shnong Mawranglang hajan ka jingkieng Wah Rilang, u nongñiah um lah shuh ban the-la-kam ïa ka kali namar ka don jingthut bad katei ka bus ka la tynrah noh sha ka bynta jong u lum. Ha katei ka por, u nongñiah bad ar ngut ki nongleit nongwan kiba shong hangta ki la mynsaw.
Katkum ka jingïoh lum jingtip, kiba mynsaw ki kynthup ïa u Akon Nath (39), u Neru Marak (65) na Resubelpara, North Garo Hills bad u Sailendro B. Sangma (70) na Resubelpara ha kaba ïa kine la pynkit sha Mawkyrwat Civil Hospital. Katba ïa ki ar ngut, kata u Neru Marak (65) bad u Sailendro B. Sangma la pynkynriah sha NEIGRIHMS, Shillong na ka bynta ka jingsumar kaba kham bniah bad ki la ïoh mih noh mynta ka 28 tarik Lber, 2026.
Halor katei ka jingjia la leit jurip da u Enquiry Officer, SI R. Rymbai ryngkat bad ki staff jong ka Mawkyrwat Traffic Branch. Ïa ki jingdonkam katkum ka Motor Vehicles Act la pyndep ha katei ka jaka. Ïa ka kali bala julor la tan noh sha Mawkyrwat Police Station.
